- Белай Горатааҕы Култуура киинигэр бэтэрээннэр барахсаттар сэрии сылларыгар тыылга, дойдуну чөлүгэр түһэриигэ бэйэни харыстаммат үлэлэрин туоһулуур уордьаннарын, мэтээллэрин түөстэригэр анньынан килэпэчитэн, эйэҕэс мичээр кэһиилээх сааланы толору мустубуттарын көрөн киһи үөрэр, кинилэринэн киэн туттуу санаата үөскүүр.
- Улуус уонна бөһүөлэк бэтэрээннэрин сэбиэттэрэ, Белай Гора социальнай үлэһиттэрэ, култуура управлениета биэчэр кыттыылаахтарыгар анаан толору астаах остуоллары тарпыттар. Хас биирдии бэтэрээни үөрэ-көтө көрсөн, маанылаан, бэлиэ күнү бэлэхтээтилэр.
- Улуус баһылыгын бастакы солбуйааччы Владимир Ильин бэтэрээннэри эҕэрдэлээн истиҥ тылларынан дьоро киэһэни аста:
- - Сэрии сылларын ыар аһыытын эккитигэр-хааҥҥытыгар иҥэринэн улааппыт, сэрии сылларын оҕолоро дэппит үтүө-мааны дьоммутун Улуу Кыайыы 70 сылынан итиитик-истиҥник эҕэрдэлээн туран, барҕа баһыыба тылларын этэбит. Эһиги кэлэр кэскил туһугар күүскүтүн-сыраҕытын анаабыт модун көлүөнэ бэрэстэбиитэллэрэҕит! Үтүө суобастаах үлэҕит кээмэйэ биллибэт, кэрэ дьыалаҕыт эһиги көлүөнэ дьону ордук киэргэтэр, ытыктатар, кэлэр көлүөнэҕэ мэлдьитин чаҕылхай холобур оҥорор.
- Салгыы эҕэрдэ, махтал тылларын бэтэрээннэр улуустааҕы сэбиэттэрин бэрэссэдээтэлэ Надежда Атласова, бөһүөлэк баһылыгын солбуйааччы Марианна Жиркова, бөһүөлэк бэтэрээннэрин сэбиэтин бэрэссэдээтэлэ Юлия Чиркова эттилэр.
- Владимир Ильин уонна Надежда Атласова бэтэрээннэр хамсааһыннарын актыыбынай кыттыылаахтарыгар "Абый улууһун бочуоттаах бэтэрээнэ" бэлиэни туттардылар. Бочуоттаах бэтэрээн бэлиэлэринэн Белай Гораттан Потапова Екатерина Романовна, Соломова Анна Николаевна, Федоров Геннадий Васильевич, Корякин Николай Николаевич, Слепцов Семен Петрович, Сергеева Анна Моисеевна, Слепцова Матрена Семеновна, Старостина Люция Михайловна, Суздалова Анна Ильинична, Неустроева Римма Ивановна, Сутуруохаттан Стручков Иннокентий Егорович, Стручков Семен Христофорович, Слепцов Валерий Егорович наҕараадаланнылар. Төһө да саастара ырааттар, биһиги бэтэрээннэрбит уопсастыбаннай олоххо, ыччаты патриот тыыныгар иитэргэ көхтөөхтүк кытталлар.
- Салгыы тылы улуус Мунньаҕын депутата, Россия Коммунистическай партиятын улуустааҕы салаатын салайааччыта Вера Слепцова ылла. Владимир Ильин, Надежда Атласова, Юлия Чиркова, Вера Слепцова РФКП Киин кэмитиэтэ олохтообут "Сэрии сылын оҕото" мэтээлинэн бэтэрээннэри наҕараадалаатылар. Бэтэрээннэр дууһаларыттан сырдаан, махтанан мэтээллэриттэн харахтара арахпат. Көрөн олорон киһи эрэ долгуйуох!
- "Сэрии сылларын оҕолоро" диэн ааттанар аҕа көлүөнэ, оччотооҕу кыһалҕалаах икки кыһарҕаннаах олох бары ыарахаттарын, аас-туор олох алдьархайын: аччыктааһыны, хоргуйууну, өлүүнү-сүтүүнү, тоҥууну-хатыыны, эрэйи-кыһалҕаны оҕо сааһыгар көрсүбүтэ. Онон бу көлүөнэ эрэйи эҥэринэн тэлбит, муҥу муннунан тыырбыт, сэрии иэдээнин эт бэйэтинэн билбит буолан олоххо сыһыана ураты харыстабыллаах, олоҕу анаарыыта олус киэҥ, ааспыт кэми сыаналыыра кырдьыктаах, билиҥҥи олоҕу көрүүтэ дьэҥкэ уонна кэлэр кэми кэрэһилиирэ олус дириҥ ис хоһоонноох. Ити кинилэри олох үөрэппит мындыра.
- Тэрээһин бэрт сэргэхтик ааста. Дьоро киэһэ кыттыылаахтара Изольда Атласова, Гаврил Дохунаев, Аграфена Глушак, Анджелика Жиркова ырыаларын истэн дуоһуйан, ытыстарын күүскэ таһынан биһирииллэрин биллэрдилэр. Сынньанан, астынан, өссө үҥкүүлээн сэгэлдьийдилэр. Кырдьык да, бүгүн кинилэргэ үөрүүлээх күн буолла.
- Сэрии сылларын оҕолоро дьаһал үрдүк таһымнаахтык уонна түмсүүлээхтик барбытыгар тэрийээччилэргэ улахан махталларын тириэртилэр.
При частичном или полном использовании материалов гиперссылка на сайт ysia.ru обязательна.
Комментарии Добавить комментарий
Авторизация на сайте через социальные сети