Улуустааҕы култуура салаатын начаалынньыга Аксинья Сивцева бэлиэтээбитинэн, 2015 сыл - ураты сыл. Быйыл улууска ааҕар балаҕан аһыллыбыта 90 сыла бэлиэтэнэр. «Кыыс дьылҕата» сэһэн ааптара, биир дойдулаахпыт, саха суруйааччыта Иван Готовцев төрөөбүтэ 100 сыла бэлиэтэнэр. Маны таһынан Улуу Кыайыы саастыылааҕа - улуустааҕы «Севернай заря» хаһыат 70 сыллаах үбүлүөйүн көрсөөрү бэлэмнэнэбит. Өймөкөөн улууһа талааннаах дьонунан баай. Быйыл олортон биирдэстэрэ - эбээн мелодиһа, хоһоон айааччы Андрей Громов-Агди үйэ аҥардаах үбүлүөйэ бэлиэтэниэхтээх.

Литература сылын үөрүүлээх аһыллыытыгар «Металлург» Култуура дьиэтигэр сценаттан нуучча, саха, татаар о.д.а. омуктар тылларынан иэйиилээх хоһооннор кутулуннулар, араас идэлээх улуус олохтоохторо Сергей Есенин, Александр Пушкин, Михаил Лермонтов о.д.а класстиктар хоһооннорун иэйэн-куойан туран аахпыттарын саалаҕа мустубуттар долгуйа иһиттилэр.