Булгуруйбат модун санаалаах, саха Островскайынан билиниллибит Николай Абыйчанин баара буоллар, бу күннэргэ 90 сааһын туолуо этэ... Кини төһө да хараҕынан көрбөт, кулгааҕынан истибэт, бастакы группалаах инбэлиит буолан уһун эрэйдээх олоҕу олордор, ыарыһыахпын диэн үҥсэргээбэккэ, дьону кытта тэҥҥэ алтыспыта, бар дьонугар күүстээх, модун санаалаах киһинэн биллэрэ.

Абыйчаниҥҥа анаммыт “Дьылҕам хагдарыйбат чараҥа” диэн литературнай киэһэ улуустааҕы киин бибилиотека тэрийиитинэн буолла. Манна Николай Васильевич аймахтара, үөлээннээхтэрэ, биир дойдулаахтара кыттыыны ыллылар. Истиҥ көрсүһүүгэ Николай Абыйчанин олоҕо, айар үлэтэ сырдатылынна, кини олоххо тардыһыытын, үлэҕэ бэриниилээҕин туһунан үгүс тыл этилиннэ.

Абыйчанин аатырбыт “Чучунаа уонна Суланньа” кэпсээнинэн театрализованнай туруоруу үгүс болҕомтону тарта. Библиотека уонна “Хобо” литературнай түмсүү эдэр чилиэннэрэ олус итэҕэтиилээхтик толорон, ыалдьыттар сэҥээриилэрин ыллылар.

Абыйбыт биир чулуу уола Николай Абыйчанин дьулуурдаах хорсун санаата, ыарыылартан-ыарахаттартан чаҕыйбакка олоҕун сыралаах үлэҕэ анаабыта, норуотугар муҥура суох таптала эдэр ыччаты иитиигэ үтүө холобур буолар. Кини айан, үлэлээн хаалларбыт баай ис хоһоонноох нэһилиэстибэтин билэрбит, үөрэтэрбит, ыччакка өйдөтөрбүт биһиги ытык иэспит.