Саха театрыгар суруйааччы Тумарча үбүлүөйүгэр анаммыт үөрүүлээх киэһэ буолла

Олунньу 24 күнүгэр Саха театрыгар биллиилээх прозаик, публицист, СР Государственнай бириэмийэтин лауреата Василий Егоров-Тумарча 80 сааһыгар анаммыт дьоро киэһэ буолла.


Үөрүүлээх биэчэри саха народнай поэта Наталья Харлампьева киири тылынан аста. Филологическай наука доктора Дора Васильева Тумарча айар үлэтин туһунан дакылаат оҥордо. Чурапчы улууһун дьаһалтатын баһылыга Андрей Ноговицын тыл этэригэр Василий Назарович саха литературатын инники күөнүгэр сылдьар суруйааччы диэн бэлиэтээтэ.
Ил Түмэн депутата Елена Голомарева, Иван Шамаев, Николай Кириллин, Валерий Луковцев, Василий Дарбасов, Владимир Борисов, Ульяна Винокурова үбүлээргэ истиҥ тыллары анаатылар. Чурапчы улууһун делегацията биир дойдулаахтарын «түс-бас тыллаах суруйааччы» диэн туран, убаһа, ноутбук, хартыына бэлэхтээтэ.
Тэрээһиҥҥэ «Эрэл» үҥкүү ансаамбыла, Чурапчы улууһун уус-уран самодеятельноһын коллективтара кытыннылар.
Суруйааччы 80 сааһыгар анаммыт дьаһаллар сылы быһа ыытыллыахтара. Ол курдук, Дьокуускайга, Чурапчыга, төрөөбүт Одьулуунугар үөрүүлээх тэрээһиннэр, ыһыах буолуохтара.