Саха тылын уонна анал идэлээхтэрин өрөспүүбүлүкэтээҕи форумугар үөрэх кыһатын бүтэрбит ыччат уонна устудьуон муһуннулар. Тэрээһини Хотугуу-Илиҥҥи федеральнай университет Хотугулуу илиҥҥи норуоттар тылларыгар института тэрийдэ. Институт дириэктэрэ Гаврил Филиппов салайан ыыппыт форумугар элбэх ыалдьыт сырытта. Ил Түмэн депутата Иван Шамаев, “Саха” НКИК президенэ Иван Андросов саха ыччатын инникитигэр көрүүлэрин кэпсээтилэр. Уопсай тиэмэ быһыытынан, саха тылын сайдар кэскилин, саха саҥа алпаабытын о.д.а. тула кэпсэтии буолла.

Үбүлүөйдээх тэрээһиннэр чэрчилэринэн Платон Ойуунускай аатынан СӨ Государственнай бириэмийэтин лауреата Василий Никитич Протодьяконов 80 сааһыгар аналлаах үөрүүлээх киэһэ ыытылынна. Университет проректора Михаил Федоров Василий Протодьяконовка ыччаты иитиигэ өр сыллаах үлэтин иһин биир мөлүйүөн солкуобай бириэмийэни аныыр туһунан ректор Евгения Михайлова бирикээһин ааҕан иһитиннэрбитин мустубут дьон дохсун ытыс тыаһынан көрүстэ.

Бүгүн “Наследие предков и современный тюркский мир: языковые и культурные аспекты” норуоттар икки ардыларынааҕы конференция ыытыллыа. Сарсын Суорун Омоллоон аатынан Опера уонна балет государственнай театрыгар общественность үөрүүлээх мунньаҕа буолуоҕа. Үбүлүөй тэрээһиннэрэ университет культурнай киинигэр уонна үөрэнэр куорпустарынан ыытыллыахтара.