Степан Васильев аатынан Ньурба 1 нүөмэрдээх орто оскуолатын территориятыгар сэриигэ баран эргиллибэтэх буойун учууталларга уонна выпускниктарга анаммыт стендэ үөрүүлээх быһыыга-майгыга аһылынна. Урут, эргэ оскуола дьиэтэ умайыан иннинэ, маннык  обелиск баар этэ диэн оскуола музейын салайааччыта Анастасия Григорьевна Николаева кэпсиир.

Маны сэргэ историяны үйэтитэр эмиэ биир бэлиэ түгэн Октябрьскай нэһилиэккэ буолан ааста. Аҕа дойду Улуу сэриитин кыттыылааҕа, Саха АССР норуотун хаһаайыстыбатын үтүөлээх үлэһитэ Илья Дмитриевич Теленковка анаммыт сквер үөрүүлээхтик аһылынна. Илья Теленков тыа хаһаайыстыбата сайдыытыгар, атаҕар туруутугар сүҥкэн кылааты киллэрбит сатабыллаах салайааччынан уонна дьоҥҥо биллибитинэн «мелиорация аҕатынан» буолар.

Аҕа дойду уоттаах сэриитигэр олохторун толук уурбут, Ийэ дойдуларыгар ытык иэстэрин чиэстээхтик көмүскээбит эмиэ хорсун буойуттарга анаммыт стендэни Ньурбатааҕы судаарыстыбаннай көһө сылдьар драматическэй театр таһыгар арыйдылар. Бу театр историятыгар маннайгы өйдөбүнньүк бэлиэнэн буолла.

Бу курдук кэнэҕэһин кэнчээри ыччакка үтүө өйдөбүл иҥэрэр история чахчылаах туоһутунан буолар бэлиэлэр Ньурбаҕа үгүс сиргэ, тэрилтэлэргэ туруорулуннулар. Сыл устата былааннаах үлэ салҕанан, историяны кэрэһилиир ытык сирдэр өссө үксээн иһиэхтэрэ.