Василий бу хорсун айанын сыала-соруга даҕаны дириҥ ис хоһоонноох. Кини фашистскай халабырдьыттары утары кыырыктаах кыргыһыыга киирсэн, өстөөҕү арҕагар тиийэн урусхалласпыт төрөөбүт дойдутун ньургун буойуттарын: бастатан туран I Украинскай фроҥҥа сулууспалаабыт эһэтин Матвеев Василий Петровиһы, Советскай Союз үс Геройун - Н.А.Кондаковы, Н.С.Степановы, А. Мироновы, учууталлыы сылдьан сэриигэ ыҥырыллан баран өлбүт эһэтин бииргэ төрөөбүт быраатын Матвеев Иннокентий Петровиһы, сэрииттэн эргиллэн кэлэн, тыылга күргүөмнээх үлэни тэрийэн, биир дойдулаахтарын сэрии аас-туор сылларын кэмигэр хоргуйан өлүүттэн быыһаабыт хаан уруу таайдарын Г.Р.Филипповы, И.Г.Кононовы, Улуу Кыйыыны уһансыбыт оччотооҕу Советскай Союз бары ньургун уолаттарын кытта «Өлбөт-сүппэт полкаҕа» кыттар, тэҥҥэ хаамсар соруктаах.

Сындалҕаннаах уһун айаныгар көрсүбүт дьоно бары Василий бу хорсун сырыытын ис сүрэхтэриттэн биһирииллэрин, өйүүллэрин биллэрэллэр эбит.Киниэхэ туох кыалларынан көмөлөһөр, ардыгар хонук сирин тэрийэн, сынньатан, өйүө биэрэн ыытар ол үтүө санаалаах дьоҥҥо Василий махталын тиэрдэр. Урукку курдук норуоттар доҕордоһулара, киһи киһиэхэ доҕор, атас диэн ытык өйдөбүллэр лаппа сүтэ быһыытыйбыттарын, суох да буолбуттарын курдук дойҕохтууллара олоҕо суоҕун, араас омук боростуой дьоно билигин даҕаны киһиэхэ көмөлөһөр үтүө санаата сүтэ илигин, Улуу Кыайыы уонна төрөөбүт дойдуга таптал, төрөөбүт дойдунан киэн туттуу диэн ытык өйдөбүллэр дьону түмэр, сомоҕолуур күүстээхтэрин туһунан уһун айан тухары араас дьоннуун алтыспыт, кэпсэппит, үтүө санаа диэн тугун этинэн-хаанынан билбит Василий этэр. Онно барытыгар, бука, дойдутуттан ыраах айаҥҥа аттанар күнүгэр Бүлүү ытык дьоно, эдэр ыччата «Олоҥхо дьиэтигэр», Кыайыы Болуоссатыгар, Улуу сэрии кыттыылааҕа, ытык кырдьаҕас Н.С.Николаев дьиэтигэр анаан-минээн алҕаан, бары үтүөнү баҕарбыттара күүс-көмө буоллаҕа.

Улуу Кыайыы 70 сылын туолар өрөгөйдөөх үбүлүөйүгэр анаан Василий маннык Саха сирин үрдүнэн суох хорсун уонна үтүө санааны ылыммытын СӨ Бырабыыталыстыбатын бэрэссэдээтэлэ Г.Данчикова үрдүктүк сыаналаата. Уонна эдэр ыччаты патриотическай өйгө-санааҕа иитиигэ бу айаны уһулуччу суолталааҕынан ааҕан, Москубаҕа баар СӨ бэрэстэбиитэлистибэтигэр Улуу Кыайыы 70 сылыгар аналлаах тэрээһиннэригэр Василийы кытыннарарга дьаһал биэрдэ. Биир дойдулаахпытын Улуу Кыайыы 70 сылын туолар өрөгөйдөөх күнүнэн итиитик-истиҥник эҕэрдэлиибит!

Бэтэрээннэр улуустааҕы сэбиэттэрин бэрэссэдээтэлэ Г.А. Солтуев

Спорткомитет начаалынньыга Г. С. Евсеев

Ыччат политикатын салаатын начаалынньыга Н. Н. Харлампьев