18-с чыыһылаҕа сэрии, тыыл, үлэ ветераннарыгар, сэрии оҕолоругар анаммыт «Кэс тылы сүрэххэ сөҥөрөн» диэн тэрээһин буолла. Бу тэрээһини Хомус музейын сэбиэдиссэйэ М.С.Васильева уонна СӨ культуратын үтүөлээх үлэһитэ В.В.Васильев иилээн-саҕалаан ыыттылар. Кэлбит ыалдьыттар Владимир Васильев, Августа Семенова, Клавдия Иванова, Екатерина Алексеева ырыаларын, Антонина Николаева уонна Николина Семенова хоһооннору ааҕыыларын долгуйа иһиттилэр. Маассабай чааска араас куонкурустар ыытылыннылар, киирии билиэтинэн лотерея оонньонно. Түмүккэ тыл эппит сэрии бэтэрээнэ Афанасий Николаев Советскай Союз Геройа Н.С.Степанов туһунан ахтыыта тэрээһини киэргэттэ. Ыалдьыттар ахтыыны бэркэ сэҥээрэн иһиттилэр, бэтэрээҥҥэ махтанан элбэхтик ытыс таһыннылар. Үс чаас биллибэккэ ааста. Бэтэрээннэр уонна сэрии оҕолоро дуоһуйа сынньанан, музей үлэһиттэригэр дьолу-соргуну баҕаран, үөрэн-көтөн тарҕастылар.

20-һискэ, сэрэдэҕэ, алын кылаас оҕолоругар Кыайыы 70 сылыгар  анаммыт куонкуруска биэс хамаанда кытынна. Манна Г.И. Чиряев аатынан 1№-дээх оскуола 4-с кылааһын үөрэнээччилэрин «Варяг» хамаандалара бастаата.

Ыам ыйын 18 күнэ – Музей аан дойдутааҕы күнэ. Бу күнү бэлиэтээһин чэрчитинэн, музейдарга «Музейга түүн» диэн тэрээһин ыытыллар буолбута хаһыс да сыла. Ыам ыйын 22 күнүгэр биһиги музейбыт быйылгы «Музейга түүну» сахаҕа да, нууччаҕа да олус ытыктанар сааскы Ньукуолун күнүгэр анаан ыытта.

Музей директора Т.Н. Афанасьева киирии тылы эттэ. Ыалдьыттары эҕэрдэлээн Вася Тараховскай «Мин айаас атым» ырыаны ыллаата. Музей бары тэрээһиннэригэр мэлдьи көхтөөхтүк кыттар Герой Степанов аатынан 3 №-дээх оскуола 3-с кылааһын оҕолоро (учуутал О.И. Кычкина) Улуу Кыайыыга анаммыт хоһооннору ааҕан ыалдьыттары эҕэрдэлээтилэр. Чочу бэтэрээннэрин сэбиэтин уонна И.М. Гоголев-Кындыл музейын үлэһиттэрин аатыттан эҕэрдэ тылы Г.Н. Алексеева эттэ уонна «Биһиги эмиэ «Музейга түүнү» ыытыахпыт, онно ыҥырабыт» диэтэ. Биир бэлиэ түгэнинэн улуус суруйар дьарыктаах дьахталлара Антонина Николаева, Лукерья Николаева уонна Анна Аммосова бэйэлин хоһооннорун ааҕыылара буолла.

Ити кэнниттэн музей саалаларын кэрийэн көрүү буолла. Урукку үтүө үгэһи салгыыр, көрөөччүлэр чугаһаатахтарына, хамсаан кэлэр экспонаттар элбээбиттэр.

«Музейга түүн» ыалдьыттарын биэс ынахтаах Бэйбэрикээн эмээхсин (Анна Николаева), кырдьаҕас балыксыт (Наталья Сергеева), кымыс көөнньөрө турар ыал сытыы-хотуу ийэтэ (Антонина Николаева), суорунаны тардан көлөһүн аллыбыт Эрилик Эристиин Хачыгырын санатар оҕо (Вова Тихонов), чэйдии олорор саха мааны ыала (Мария Васильева, Ира Иванова, Андрей Иннокентьев), сордоох суханы кытта сосуһар уол (Павлик Корякин), кустуу барбыт аҕаларын кыыһынаан кэтэһэр куорат былыргы ыалын ийэтэ (Сардаана Сыроватская кыыһа Сайыыналыын), атыылаан эргитэр-урбатар хотун (Прасковья Гаврильева) көрүстүлэр. Көрөөччүлэргэ экскурсовод быһыытынан сылдьыбыт Марфа Васильева элбэҕи ыһа-тоҕо кэпсээтэ, улууспут урукку дьонун олохторун сырдатта.

Тэрээһиҥҥэ араас викториналар, таабырын таайтарыыта, экспонаттары сөпкө ойуулааһыҥҥа куоталаһыы, сүүйтэриитэ суох лотерея, хаартыскаҕа түһүүлэр тэриллэннэр элбэх киһи кытынна, өттүк харалаах, илии тутуурдаах дьиэлээтэ. Оонньуулар быыстарыгар уолаттар көхтөөх ырыалара, Наталья Еремисова кэрэ куолаһа дуораһыйдылар. Чочулар рассада үүнээйилэрин, быырпахтарын, суораттарын атыылаатылар.

Музей үлэһиттэрин сылын аайы «Музейга түүн» тэрээһиҥҥэ кыттар дьон ахсаана элбээн иһэрэ үөрдэр. Элбэх ыал дьиэнэн кэлэн оонньоон, сынньанан барда. Түүн 12 чааска диэри киһи кэлиитэ салҕанан бара турда. Бэл музейы сабаары турдахха эдэр ыччат бөлөҕө кэлэн, куонкурус ыытылынна. Быһа холоон ааҕыынан 700-тэн тахса ыалдьыт сылдьан ааста. «Музейга түүн» дьон-сэргэ биһирэбилин ылла, онон үрүҥ түүннэрдээх Бүлүүгэ бигэтик пропискаланна диэххэ сөп.