Тэрилтэлэр идэлэринэн араас байыаннай холуонналары олохтоотулар. Ол курдук оройуон, бөһүөлэк салалталара военачальник, политрук буоллулар, оройуоннааҕы киин балыыһа – байыаннай медиктэр быраастар, санитардар, сиэстэрэлэр, аэропорт үлэһиттэрэ – байыаннай летчиктар, почталар – связистар, о.д.а. сэрии саҕанааҕы байыаннай идэлээхтэр формаларынан таҕыстылар. Оттон оскуола үөрэнээччилэрэ уонна учууталлар дойдубут араас норуоттарын национальнай көстүүмнэрин кэттилэр.
Кыайыы болуссатыгар оройуон салайааччылара Хонуу бөһүөлэгин олохтоохторун Улуу Кыайыы 70 сылынан итиитик-истиҥник эҕэрдэлээтилэр. Муома орто оскуолатын активист үөрэнээччилэрэ Муома оройуонуттан төрүттээх сэрии кыттыылаахтарын обелискаларыгар венок уурдулар. Сэрии оҕолорун – тыыл, үлэ ветераннарын кытта хаартыскаҕа түһүү буолла. Болуоссакка атыы-эргиэн үлэлээтэ, полевой куукуна олохтоохтору босхо итии чэйинэн уонна перловай хааһынан күндүлээтэ.
Бу күн Хонууга олус тымныы буолла -11 кыраадыс уонна хотуттан күүстээх тымныы тыал үрдэ. Ону аахсыбакка Улуу Кыайыы 70 сылыгар анаммыт парадка дьоннор маассабайдык кытынна, тэрилтэлэр тэрээһиннээхтик таҕыстылар, көрү-нары көҕүлүттэн туттулар. Оройуоннааҕы "Индигир уоттара" хаһыат бирииһигэр хас Кыайыы күнүн аайы сыллата ыытыллар сүүрүү күрэхтэһиитэ тымныыта бэрдиттэн атын күҥҥэ көстө.
Туйаара СЛЕПЦОВА.
Комментарии
Авторизация на сайте через социальные сети