Кыайыы болуоссатыгар олохтоохтор парадтаан иһэллэр. Инники кэккэҕэ улууска саамай элбэх көмүһү хостуур «Янтарь» ХЭТ ыарахан уйуктаах тиэхиньикэлэрэ ол сыллааҕы танкалары, бойобуой массыыналары санатан аастылар.
Дьон-сэргэ Кыайыы болуоссатыгар тоҕуоруһа мунньустубутун кэннэ Кыайыы күнүгэр аналлаах миитини аһар эҕэрдэ тылы улуус баһылыга Михаил Захаровка биэрдилэр. Баһылык эҕэрдэ тылыгар улуустааҕы ветераннар сэбиэттэрэ уонна улуус дьаһалтата биир сүҥкэннээх дьыаланы ситиспиттэрин билиһиннэрдэ. Ол курдук, кинилэр быһаччы туруорсууларынан уонна улахан үлэни ыыппыттарын түмүгэр Уус-Ньара олохтооҕо 90 саастаах Николай Шевченко Аҕа дойду Улуу сэриитин кыттыылааҕа аата иккистээн төнүннэ. Онон Өймөкөөн улууһун олохтоохторо Улуу Кыайыы үбүлүөйдээх 70 сылын ветераннаах көрүстүлэр.
Көмүс хостуурунан дьарыктанар «Янтарь» ХЭТ быйыл тэриллибитэ 10 сылыгар уонна Улуу Кыайыы үбүлүөйдээх 70 сылыгар анаан Кыайыы болуоссатын саҥардан оҥорор сорук турбута. Саҥа мемориальнай комплекс бу бэлиэ күҥҥэ аһылынна. Комплекс үс пааматынньыктан турар. Сүрүн пааматынньык – саабыланы өрө ууммут, кыра оҕону көтөҕөн турар дьахтар. Волгоград куоракка Мамаев кургаҥҥа турар «Родина-мать зовет!» диэн Сталинградтааҕы кыргыһыы дьоруойдарыгар анаан оҥоһуллубут пааматынньыгы санатар. Сүрүн композиция хаҥас өттүгэр саха снайперын уонна былаах тутааччы (Знамяносец) пааматынньыктара тураллар. Балар оҥоһуллубуттара Кыайыы болуоссатын бары өттүнэн ситэрэн-хоторон биэрэллэр.
Кыайыы болуоссатын саҥа комплексын аһыы кэмигэр саха снайперын пааматынньыгын номоххо киирбит саха снайпера Иван Кульбертинов аймах-быраата РФ ИДЬМ-ин Өймөкөөннөөҕү отделениетын начаалынньыга Николай Кульбертинов аспыта чахчы уратытык көһүннэ. Сүрүн паамытынньыгы Өймөкөөн улууһун баһылыга Михаил Захаров уонна бу комплексы оҥорууну үбүлээбит «Янтарь» ХЭТ салайааччыта Александр Карась үөрүүлээх быһыы-майгы ортотугар астылар. Дьон-сэргэ үөрэн, «Ураа!!! Ураа!!! Ураа!!!» хаһыытастылар. Үөрүүлэрэ муҥура суох.
Аҕа дойду сэриитэ саҕаланаатын кытта Өймөкөөн улууһуттан быһаччы сэриигэ ыҥырыллан барбыт суох. Хоту улуустартан дьону сэриигэ ыҥырбат туһунан дьаһал тахсыбыта. Ол оннугар кинилэр тыылга үлэлээбиттэрэ, түүлээхтээбиттэрэ, бултаабыттара-алтаабыттара. Сэрии буолар кэмигэр Өймөкөөнтөн төрүттээх эрээри, атын улууска олорор уонна Сэбиэскэй Сойуус улахан куораттарыгар үөрэнэ сылдьар устудьуоннар уоттаах сэриигэ ыҥырыллыбыттара.
Кыайыы буолан, эйэлээх олох түстэммитин кэнниттэн Өймөкөөҥҥө көмүс промышленноһыгар үлэлии кэлбит буойуттар олохсуйбуттара, көмүс уҥуохтара Өймөкөөҥҥө хаалбыта. Кинилэр ааттара саҥа комплекска мраморга көмүс буукубанан суруллан үйэтитилиннэ. Билигин кинилэр оҕолоро, сиэннэрэ, хос сиэннэрэ олоҕу салгыыллар. Өймөкөөҥҥө көмүс промышленноһын үлэтэ тохтообот, өссө сайдар, кыаҕырар, олох салҕанар.
P.S. Сүрүн пааматынньык (саабыланы өрө ууммут, оҕо көтөҕүүлээх дьахтар) үрдүгэ биэс миэтирэ, акылаатын кытта 10 миэтэрэ. Боруонсаттан кутуллубут.
Автор хаартыскаҕа түһэриитэ
Комментарии
Авторизация на сайте через социальные сети