Бэлиэ күҥҥэ сыһыары тутуллубут үөрүүлээх миитин РФ тырааныспарга министиэристибэтин, «Российские железные дороги» эҕэрдэтиттэн саҕаланна. «БАМ – дойду биир баараҕай бырайыага. Тыһыынчанан субуллар тимир суолу батыһа саҥа куораттар, бөһүөлэктэр дьэндэйдилэр. Бу тимир суол Уһук Илиҥҥэ, Сибииргэ ураты улахан наадалааҕын олох бэйэтэ көрдөрдө. Маны кэҥэтии бүгүҥҥү бэбиэскэҕэ киирэр», – диэтэ «РЖД» ААО президенэ  Владимир Якунин.

 "Дойдуга тимир суол комплексыгар БАМ — дьоһун уонна тутаах чааһа. Манна сүүһүнэн тыһыынча киһи олорор уонна үлэлиир. Саха сирэ дойду баараҕай тутуутугар киллэрбит кылаатынан киэн туттар", - диэтэ парламент бэрэссэдээтэлэ Александр Жирков.

 Дьоҕус БАМ-ы (Тында станциятыттан Саха сиригэр диэри барар суолу маннык ааттыыллар) тутууга Саха сириттэн комсомоллар икки этэрээттэрэ тиийбитин Александр Николаевич эттэ. "Бастакы – «Комсомолец Якутии» бэйэтин састаабыгар 26 киһилээҕэ (хамандыыр - Анатолий Климов, хамыһаар - Гаврил Адамов). Бу этэрээт Бам – Тында – Беркакит тимир суолу тутууга 1974 сыллаахха барбыта. Саха сириттэн тиийбит тутааччылар  атыттары кытта тэҥҥэ тимир суол тутуллуохтаах суолун солообуттара, Беленькая, Аносовская уонна Могот тимир суол станцияларын тутууга дьүккүөрдээхтик үлэлээбиттэрэ. 1975 сыл тохсунньутугар Беркакит – Томмот – Дьокуускай тимир суолу тутууга «Якутский комсомолец» иккис этэрээт айаннаабыта. (Тиһэҕэр бу этэрээт бастакыны кытта холбоспута). 1975 сыллаахха тохсунньу 12 күнүгэр уобаластааҕы ХХХI комсомоллар конференцияларыгар хамыһаарынан  Виктор Яковлевы талбыттара. Хамандыырынан эдэр тутааччы  Алексей Иванченко буолбута.

 Тимир тутааччылартан үгүстэрэ олох оскуолатын, тургутуутун манна ааспыттара. Сэбиэскэй сойуус араас муннуктарыттан мустубут эдэр дьон баар ыарахаттартан толлубакка, тутууга дүккүөрдээхтик үлэлээбиттэрэ. Тайҕа ортотугар аныгы куораттар дьэндэйбиттэрэ, Илиҥҥи Сибииргэ уонна Уһук Илиҥҥэ нефть, газ, алмаас, чох промышленноһын бастакы олугун уурбуттара. БАМ-га үлэ үтүө үгэстэрэ манна саҕаламмыттара. Оттон БАМ бүгүҥҥүтэ — кылгас суолунан транзитнай айаны тэрийиини хааччыйар. Ону таһынан Илин уонна арҕаа континеннар икки ардыларыгар хайысханы үөскэтэр", - диэтэ  Александр Жирков.

Эбиэт саҕана БАМ бэтэрээннэрин чиэстээтилэр-бочуоттаатылар. 12:00-тан 18:00 чааска диэри норуот коллективтара кэнсиэрдиэ, дьон-сэргэ күүлэйэ, сынньалаҥа тэриллиэ.

Россия президенэ Владимир Путин телемост режиминэн БАМ үлэлээбит уонна үлэлиир дьону эҕэрдэлээтэ. Владимир Путин  тимир суол «үрүҥ көмүс» утаҕын ууруу саҕаланарын биллэрдэ.