Тэрээһин кыттыылаахтара биэс күнү быһа аныгы тыа сирин оскуолата хайдах буолуохтааҕын, кадр солбугун, учуутал үөрэтэр таһымын үрдэтэр, үөрэтии саҥа технологияларын киллэрэр ис хоһоонноох былаһааккаларга, “төгүрүк остуолларга” кытыннылар. Итиэннэ дойду киин уобаластарыгар үөрэхтээһин ханнык таһымҥа тахсан турарын кэпсээтилэр.

Д.С.Спиридонов аатынан Үөһээ Бүлүү 4 №-дээх орто оскуолатын директора, история учуутала Юрий Кынатов съезд туһунан санаатын бу курдук үллэһиннэ:

- "Сүрдээх үчүгэй ис хоһоонноох тэрээһин буолан ааста. Тыа сирин оскуолатыгар туһаайан, государство политикатын тосту уларытыахтааҕа, бу оскуолатын өйөөтөҕүнэ эрэ дойду инникилээх буолуо диэн санаа бигэтик этилиннэ. Ол курдук, тыа сиригэр олорор, оҕону иитэр, бизнеһи тэринэр быдан барыстаах диэн өйдөбүл олохсуйуохтаах, ону сүрүн көҕүлээччинэн оскуола буолуохтаах. Ону Тамбов уобалаһа олоххо киллэрэн эрэрин көрдүбүт. Биэс сыл иһигэр саҥа оскуола бөҕө тутуллубут. Бу оскуолалар социокультурнай кэмпилиэк киинин быһыытынан бөһүөлэк олоҕун бүтүннүү сүрүннүүллэр, быһата оскуола директора нэһилиэк баһылыгын социальнай үлэҕэ солбуйааччытын курдук буолбут. Дьэ, ол биһиги усулуобуйабытыгар төһө сөп түбэһэрин үөрэтэн көрүөхтээхпит. Улахан болҕомто эбии үөрэхтээһиҥҥэ ууруллубут. Оскуолалар ыккардыларынааҕы үөрэтэр-производственнай кэмбинээттэри технологическай хайысхалаах эбии үөрэхтээһин кииннэригэр кубулуппуттар. Биһиги эбии көрүллэр уон чааска сүрүннээн КГЭ-ҕэ, ОГЭ-ҕэ бэлэмниир буоллахпытына, кинилэр барытын оҕо сайдыытыгар ыыппыттар. Тамбовка бурдугу хото ыһар буоланнар, агрооскуолалар научнай-чинчийэр үлэни күүскэ дьарыктаналлар эбит.

Биһиги усулуобуйабытыгар тугу киллэриэххэ сөбүй? Улуустарга лабораториялаах, үөрэх бары хайысхатын хабар биирдии күүстээх технологическай кииннэри тэрийтэлиэххэ наада. Бизнес-инкубатор курдук, оҕо тугу сөбүлүүрүнэн бэйэтэ дьарыктаныахтаах. Ол гынан баран, биһиги агро-оскуолаларбыт быдан барыстаахтык үлэлииллэр эбит. Ону сокуон өттүнэн хааччахтаах буоланнар, кыахтарын кыайан таһаарбаттар. Итиннэ уларыйыы наада. Итиэннэ “Сыл учуутала” кулууп иһинэн арктическай улуустар учууталлара кэлэн стажировка барар бырайыактарын оҥордубут.

Биһиги өрөспүүбүлүкэбит үөрэхтээһиҥҥэ ыытар үлэтэ куруук болҕомто киинигэр сылдьар. Бу да сырыыга Саха сирин миниистир Д.В.Ливанов дистанционнай үөрэхтээһини уонна ИКТ-ны ситиһиилээхтик олоххо киллэрэр регионнар ахсааннарыгар киллэрдэ. 2015 сылга спортивнай саалалары, былаһааккалары тутууга, уларытыыга субсдидия көрүллүөхтээх регионнарын ортотугар баарбыт".