«Мурманскай уобалас үп-харчы 4,1 %, Ингушетия – 5,2%, Приморскай кыраай – 6% ордугу, Саха сирэ – 10-тан тахса, Сахалин уобалаһа – 12%, Астрахань уобалаһа – 12,9% туһанааччыларга тиэрдибиттэр», - диэн хаалан иһэр регионнары Владимир Путин ааттаталаата.   

Владимир Путина этэринэн, министиэристибэ дьиэ кыылын иитиигэ, оҕуруот аһын үүннэриигэ, кредиттэри субсидялааһыҥҥа сөптөөх үбү-харчыны регионнарга ыыппыт. Ол кээмэйэ 2014 сыллааҕар элбэх. Бу хайысхаларга сыллааҕы лимит 124 млрд солк.

Ыам ыйын 21 күнүнээҕи туругунан үбү-харчыны ылааччыларга 48,5 млрд солк. быһаччы бэриллибит.  Харчы кэмигэр тиийбэтэҕинэ, бырайыак халтайга хаалыан сөбүн туһунан Владимир Путин бэлиэтээбит.

Маныаха өрөспүүбүлүкэ Тыатын хаһаайыстыбатын министиэристибэтигэр эппиттэринэн,  РФ Тыатын хаһаайыстыбатын министиэристибэтэ түһэрсиллибит сөбүлэһии чэрчитинэн 787 мөл. солк. ыам ыйын 28 күнүгэр ыыппыт.

Биэдэмистибэҕэ үбү-харчыны туһаныы тоҕо бытаарбытын баһаардылар. Кинилэр эппитэригэр сигэннэххэ, сорох хайысхаларынан докумуоннары бэлэмнии уонна тыа хаһаайыстыбатын бородууксуйатын оҥорооччуларга үбү-харчыны ыытар үлэ бара турар. Путин уонна Ткачев бу туһунан дьүүллэһиилэрин саҕана үбү-харчыны биэрэр туһунан быһаарыылар ылыллыбыттарын уонна туһанааччыга  тиэрдии процеһа бара турбутун туһунан министиэристибэҕэ эттилэр.

«Кредит бырыһыанын ыстаапкатын сорох чааһын субсидялааһыҥҥа тиксээччилэри талыы ыам ыйын 15 күнүгэр түмүктэммитэ. Оттон дьоҕус хаһаайыстыбаларга кредит бырыһыанын ыстаапкатын субсидиятыгар тиксээччилэр докумуоннарын бэрэбиэркэлии сылдьабыт. Маныаха анаан үлэлиир хамыыһыйа бэс ыйын 2 күнүгэр мунньахтыыр. Ыам ыйын 26 күнүгэр сылгыны үөрэдээн иитээччилэри өйүүргэ субсидяҕа тиксээччилэри талыы биллэриллибитэ», - диэн СӨ Тыатын хаһаайыстыбатын министиэристибэтин иһитиннэриитигэр этиллэр.  

Тыа хаһаайыстыбатын министиэристибэтигэр эппиттэринэн, ыам ыйын 15 күнүгэр «Саҥа саҕалыыр фермердэри өйөөһүн» куонкурус кыайыылаахтарын быһаарар бирикээс тахсыбыт. Итиниэхэ 88 мөл.солк. анаммыт  Билигин 44 мөл.солк. СӨ федеральнай казначействоҕа бэриллэргэ бэрэбиэркэни ааһар.

Ыам ыйын 28 күнүгэр СӨ Тыа хаһаайыстыбатын тутуу дириэксийэтин счетугар тутааччыларга анаан 29 мөл.солк. киирбит. Ити күн үп-харчы туһанааччылар счеттарыгар ыытарга  «Россельхозбанк» ААО-ҕа тиийбит.