Манна баар көтөр ахсаана 200 тыһ. төбө, сылга 42 мөл. 470 тыһ. сымыыт оҥоһуллар. Көтөр этин оҥорон таһаарыы быһа холуйан 3,5 тыһыынча тонна. Тыыннаах кууруссаны атыылааһын көрдөрүүтэ — сылга 3 тыһыынча.

РФ миниистирэ Николай Федоров Нерюнгритааҕы көтөр фабрикатын дьиэтин таһыттан омос көрдөххө, олус судургу. Ол эрээри иһигэр киирдэххэ, аныгы үрдүк технология тилэри туттулларын ойуччу тутан бэлиэтээтэ. "Манна үлэ хаачыстыбата уонна ис хоһооно бастыҥ ирдэбилгэ сөп түбэһэр. Сырье баар, онон кыамтаны улаатыннарыахтаахпыт. Егор Борисовы кытта көтөр фабрикатын модернизациялааһын инникитин иҥэн-тоҥон ырытыахпыт", - диэтэ кини.

Николай Федоров эппитинэн, РФ-ҕа тыа хаһаайыстыбатын министиэристибэтэ Саха сирин бу эйгэтин күүскэ өйүүрүн туһунан эттэ. Үбүнэн-харчынан өйөбүл кээмэйэ 200 мөл. солкуобайтан 1 млрд. тахса солк. диэри улааппыт. Ити өрөспүүбүлүкэ салалтата тыа сирин олоҕун таһымын үрдэтэргэ, тыа хаһаайыстыбатын сайыннарарга туһуламмыт соругуттан быһаччы тутулуктаммыт: "Тыа хаһаайыстыбатыгар уонна тыа дьоно социальнай өттүнэн көмүскэллээх буоларыгар регион бюджетыттан үбү-харчыны угууга атын регионнартан инники күөҥҥэ иһэҕит", - диэтэ Н.Федоров.

Николай Федоров уонна Егор Борисов  «Якутуголь» холдинговай компания эбийиэктэригэр сырыттылар.

Егор Афанасьевич олохтоох бэчээккэ хойукку интервьютугар:  "Өрөспүүбүлүкэ промышленнай киинигэр дьон экологическай өттүнэн ыраас аһылыгынан хааччыларын туһугар тыа хаһаайыстыбатынан дьарыктаныы наадалааҕар Николай Васильевич болҕомтотун уурарын ситистим" -, диэн эппит.

Онно Е.Борисов Нерюнгритааҕы көтөр фабрикатыгар эти оҥоруу көрдөрүүтүн икки бүк улаатыннарар сорук тураны эбэн эппитэ. Николай Федоров атыттартан истэн буолбакка, бэйэтэ кэлэн, көрөн-истэн фабрика сайдар кыахтааҕар итэҕэйдэ. Онон, өйүүргэ бэлэмин биллэрдэ. Егор Борисов ааҕыытынан фабриканы модернизациялыырга миллиард аҥаара кэриҥэ солк. уонна балтараа сыл наада.

РФ-ҕа тыа хаһаайыстыбатын миниистирэ уонна Саха сирин баһылыгын эбээһинэһин быстах кэмҥэ толорооччу ырытыһыылара, кэпсэтиһиилэрэ оҥорон таһаарынан эрэ муҥурдаммата. Нерюнгри оройуонугар тыа хаһаайыстыбатын атын салааларын сайыннарыы кинилэр дьүүллэһиилэрин киинигэр буолла.

Урут промышленнай тэрилтэлэр кэтэх хаһаайыстыбалаахтара. Ол эрээри, 90-с сылларга итилэр сабыллыбыттара. Кэлин быһыы-майгы уларыйда диэн бигэтик этиэххэ сөп. Егор Борисов нерюнгрилары кытта элбэхтэ көрсүһүүтүгэр дьон тыа хаһаайыстыбатынан, ол иһигэр үүтү, эти оҥоруунан, о.д.а дьарыктаныан баҕарарын туһунан үгүстүк этэрин, туруорсарын бэлиэтээтэ.

Николай Федоров уонна Егор Борисов маннык саҕалааһыннар, көҕүлээһиннэр эргиччи өйөнүөхтээхтэрин туһунан биир санаалаахтар. Онон, СӨ тыа хаһаайыстыбатын уонна ас-үөл политикатын министиэристибэтэ федеральнай министиэристибэ тутуһар хайысхатын аахсан туран, Нерюнгри оройуонугар тыа хаһаайыстыбатын сайыннарыы бырагырааматын оҥоруоҕа.

Атын улуустартан Саха сирин соҕуруу өттүн экологическай өттүнэн ыраас бородууксуйанан хааччыйыы боппуруоһа Е.Борисовы уонна Н.Федоровы долгутар.

"Нерюнгрига тутаах суолталаах үс хайысханы Николай Федоров өйөөтө, онон, бу тула күүрүүлээхтик үлэлиэхпит", – диэтэ Егор Борисов.