Спортивнай оонньууга барыта 14 көрүҥ киирбититтэн күрэхтэһии иннинэ уон биир көрүҥҥэ спортсменнары сүүмэрдээтилэр. Бу өрөбүллэргэ оҕунан ытыыга, чэпчэки атлетикаҕа, спортиҥҥа хайа спортсмен кыттарын быһаарыахтара. Күрэхтэһии кыттыылааҕын 1792 путевкатыттан 716 бэрилиннэ. Путевка чопчу биир эрэ киһиэхэ анаммат, онон күрэхтэһиигэ кини оннугар атын спортсмен кыттар кыахтаах.

Спортсменнары таһынан оонньууга 231 судьуйа, 300 тренер, 150 бочуоттаах ыалдьыт, ис дьыала министиэристибэтин, көрдөрөр-иһитиннэрэр тиһиктэр үлэһиттэрэ, тэрийээччилэр кытталлар.

Культурнай бырагыраамаҕа үс тыһыынчаттан тахса киһи түмэ тардылынна. Бэс ыйын 20 күнүттэн ыла Граф биэрэгэр күрэхтэһии аһыллыытын сиэрин-туомун репитицията саҕаланар. Саха театрыттан  Николай Ермолаев уонна Ариан Ермолаев бэлэмннииллэр. Туруоруу ис хоһооно билиҥнитэ чып кистэлэҥ.

Саха сирин норуоттарын оонньуулара от ыйын 13-тэн 19-гар диэри Намҥа буолар. Россия олимпийскай кэмитиэтин салалтатыттан, спорт министиэристибэтиттэн ыалдьыттар кэлиэхтэрэ. Күрэхтэһии улуус киининэн, нэһилиэктэринэн араарыллан ыытыллар.