1943 сыллаахха историяҕа киирбит Курскай Тоҕой кыргыһыыта буолбут  кэмигэр, Илимниир оскуолатыгар фронтовиктартан суруктар кэлэр буолбуттара. Суруктары оскуола линейкатыгар ааҕар этилэр. Бу суруктартан Ирина Дмитриевна Батюшкинаҕа аҕатын чугас табаарыһа буолар оскуола дириэктэрин суруга өйдөнөн хаалбыт.

Эһиги иннигитигэр сэрии бүтэһик ыйдарыгар Германия сиригэр, Пруссияҕа, Кёнинсберг кириэппэһи ылыыга сэриилэспит ыстараап батальонун саллаатын тиһэх суруга.

„Александра Васильевна, дорообо!

Доруобуйа үчүгэй, билиҥҥитэ тыыннаахпын. Мин Балтика аттыгар сылдьабын, эбэтэр эһигиттэн уонтан тахса тыһыынча килэмиэтир арҕаа баарбын. Санаабыт санаам да түгэнигэр тиийбэт курдук ыраах, онон сурукта суруйуоҕу киһи өйө-санаата тиийбэт, булбат. Ол эрэн ону баһыйан туран суруйабын.

Мин бу ый 7 күнүгэр ньиэмэс буулдьатыттан кыратык бааһырдым, хаҥас илиим сөмүйэтин төрдүнэн. Онон 9 чыыһылаттан госпитальга сытабын. Фронтан ырааҕа суох сиртэн (Коршун ст.). Бу ый бүтүүтэ эмиэ инники линияҕа барарым буолуо. Бэйэм урукку чааспар түбэһэрим-түбэспэтим биллибэт, ол да буоллар чааһым аадырыһынан суруйабын.

Аадырыһым уларыйа турарыттан бу күҥҥэ диэри кимтэн да сурук тута иликпин. Итиниэхэ буруйу бэйэм сүгэбин.

Халыматтан дойдубар кэлэн 24 суукка устатыгар күүлэй хаампытым.

Пруссия помещиктарын олоҕун укулаата киһи эппэтин курдук баай-тот эбит. Ону үрдүнэн биһиги, саллааттар, көҥүл күүлэйдиибит, күөлүһүйэбит.

Бэйэм идэм — автоматчик этим, онтон пулемётчик буолбутум, оттон билигин госпитальтан туох буоларым биллибэт. Икки төгүл наҕараадаҕа бэлиэтээн тураллар, илиибэр ыла иликпин.

Дьэ, Шура, тугу элбэҕи лахсыйыамый, онон сурукпун бүтэрээри туран, эһиги суруккутун күүтэбин. Бэйэҥ ханна тугу гынаҕын? Доруобуйаҥ?

Тыыннаах хааллахха, эргиллиэм! Умнума!

Үтүө дьолу, кытаанах доруобуйаны уонна үлэҕэр кыайыыны баҕарабын!

Дьоҥҥор уонна Гришалаахха улуу алгыспын тириэрт! Батюшкин Митялаахха привет!“

Хаалабын: Еремей. Олунньу 18 күнэ, 1945 сыл.

Еремей Захарович Петров — Саха народнай поэта Владимир Михайлович Новиков-Күннүк Уурастыырап бииргэ төрөөбүт эдьиийин уола. Кини 1915 сыллаахха Амма оройуонун Эмис сэлиэнньэтигэр төрөөбүтэ. 1940 сылтан 1942 сылга диэри Орто Халыма оройуонун Бастакы Хаҥалас нэһилиэгин Илимниир оскуолатыгар дириэктэринэн үлэлээбитэ. 1943 сыллаахха баҕа өттүнэн сэриигэ барбыта. Фроҥҥа снайпер этэ. Икки төгүл наҕараадаҕа түһэриллибитэ. Кёнинсберг кириэппэһи ылыыга сырдык тыына быстыбыта.