Абыйга "Буорах сыттаах хоһооннор" диэн тиэмэҕэ Уоланнар ааҕыылара буолла

Төрөөбүт тылбытыгар аналлаах декада чэрчитинэн биһиги оскуолабытыгар, син эмиэ республика бары оскуолаларыгар курдук, араас тэрээһиннэр сыллата ыытыллаллар. Быйыл даҕаны бу үгэс кэһиллибэтэ. Эбээннии хоһооннору радионан ааҕыы, саха тылыгар аналлаах ТОК-шоу, IX кылаастар төрөппүттэригэр уонна оҕолоругар тотальнай диктант, төрөөбут тылга, фольклорга сыһыаннаах викторина ыытылыннылар, В.С. Яковлев-Далан "Дьикти саас" айымньытынан уус-уран киинэ көрдөрүлүннэ.


Декадабыт уол оҕо, эр киһи оруолун өрө тутарга аналлаах II улуустааҕы Уоланнар ааҕыыларынан түмүктэннэ. Бу сырыыга тэрээһиммит буойун-суруйааччылар айымньыларынан "Буорах сыттаах хоһооннор" диэн тиэмэнэн ыытылынна. Улуус бары оскуолаларыттан сүүрбэ алта биирдиилээн ааҕааччы, ону таһынан алта бөлөх кыттыыны ыллылар.
Тэрээһин инсценировканан саҕаланна: сэриигэ кыттыбыт 25 саха суруйааччытын туһунан кылгас инсценировкаҕа Илья Чаҕылҕан "Хайыһар" ырыа буолбут хоһоонун, Ильмень күөлгэ сырдык тыыннара быстыбыт 19-с биригээдэ хайыһардьыттарын туһунан Сергей Васильев "Улуу Ильмень" балладатын, Алексей Бродников сэриигэ айымньы хайдах айылларын туһунан суруйбут суругун уонна таптаан ааҕар суруйааччыларбыт илиилэригэр саа-саадах тутан, араас званиены ылан кыргыспыттарын туһунан оҕолор сэргии иһиттилэр. Сэрии толоонугар сураҕа суох сүппүт Никифор Седалищев-Дьүөгэ Ааныстыырап аата ахтыллан ааста. Маны барытын кэнчээри ыччат өйдүөх, билиэх, кэриэстиэх тустаах.
Түмүккэ уоланнарбыт маннык номинацияларга тигистилэр: бөлөҕүнэн ааҕыыга сүрүн бириис хаһаайыннарынан Абый оскуолатын үөрэнээччилэрэ буоллулар.
Биирдиилээн ааҕааччыларга бары даҕаны эгил-тэгил кыахтаах уоланнар киирсэн иэмэх талахтыы эрийистилэр диэххэ сөп. Ол эрээри сүрүн бириис хаһаайынынан гимназияттан Яковлев Вова буолла. Кини бу иннинээҕи ааҕыыларга эмиэ бэрт үчүгэйдик кыттан турардаах. "Төлөннөөх ааҕааччы" ааты Ураһалаах орто оскуолатын 4-с кылааһын үөрэнээччитэ Заровняев Сеня сүктэ. Майыар оскуолатын 4-с кылааһын үөрэнээччитэ Корякин Аман "Дорҕоонноох ааҕааччы" ааты ылла. Уолбут оскуолатын уолана Дохунаев Нил Виктор "Этигэн этээччи", Абый оскуолатын выпускнига Никулин Ганя "Истиҥ иһирэх этээччи", Майыар оскуолатын 9-с кылааһын үөрэнээччитэ Лебедев Егор "Хомоҕой этээччи", эмиэ бу оскуола 1-кы кылааһын үөрэнээччитэ Дохунаев Слава "Кэскиллээх ааҕааччы" номинациялар хаһаайыннарынан буоллулар. "Көрөөччүлэр биһирэбиллэрэ" номинацияны Лебедев Егор ылан үөрүүтэ үрдээтэ. Бу бырайыак автора, Майыар орто оскуолатын саха тылын, литературатын учуутала Очирова Марина Дмитриевна анал бирииһин гимназия үөрэнээччитигэр Попов Айсеҥҥа туттарда.
Эстибэт эрчимнээх, уостубат тускуллаах, чөл куттаах саха уолана көмүскүүр, араҥаччылыыр оруоллааҕын үрдүктүк тутан, кэнэҕэски көлүөнэни иитиэх тустаахпыт. Оччоҕуна норуот уйгута уһаарыллыа, саргыта салаллыа, чэчирии сайдыаҕа! Уоланнарга эр хоһуун буолуҥ диэн алгыспытын этэбит. Аны сыл көтөн баран, күрэспитигэр эмиэ кэлэн кыттаарыҥ диэн ыҥырабыт.