Улуу киһибит туһунан кинигэ сүрэхтэниитэ буолуон иннинэ, Константин Иванович төрөөбүт төрүт түөлбэтигэр - Арыылаах сиригэр-уотугар - тиийэн, аал уоту оттон, сиэри-туому тутуһан, көҥүл ылыыттан саҕаланна. Үөрүүлээх түгэҥҥэ анаан-минээн ыҥырыллан кэлбит күндү ыалдьыт, социологическай наука доктора, профессор, Ульяна Алексеевна Винокурова этэринэн, бу сир үчүгэй куттаах-сүрдээх, улахан энергетикалаах эбит.

Киэһэтин, олохтоох Культура дьиэтигэр, Константин Иванович Чирков – Ойуун Көстөкүүн туһунан кинигэ сүрэхтэниитигэр эппэтэҕи этээри, истибэтэҕи истээри инникигэ эрэллээх, нус-хас олохтоох буоларга дьулуһаары дьон тоҕуоруһа муһунна. Нэһилиэк кырдьаҕас олохтоохторо улуу убайбыт, эһэккэбит туһунан тугу көрбүттэрин-истибиттэрин олус итэҕэтиилээхтик кэпсээтилэр, айылҕаттан бэриллибит сүдү талааныгар, күүһүгэр өссө төгүл сүгүрүйдүлэр.

Константин Иванович кыыһа, республика үтүөлээх бырааһа Александра Чиркова, суруйбут кинигэтин сүрэхтээһиҥҥэ туһаайыллан, элбэх ахтыылар уонна үтүө санаалар этилиннилэр.

Тэрээһин ыҥырыылаах ыалдьыта Ульяна Винокурова ойууннааһын күүһүгэр тирэнэн, айылҕаны кытта ситими, наука өттүттэн көрүүнү мустубут дьоҥҥо дириҥ хорутуулаахтык тиэртэ.

Аатырдар-сураҕырдар, сүгүрүйэр ытык кырдьаҕаспыт эмтиирин сэргэ, алгысчыт үтүөтэ эбит. 10 сылга биирдэ этиллэр УОТ АЛГЫҺЫН кыыһа Александра Чиркова эттэ.

Халыҥ хахха, харысхал буолар ытык киһибит, арчылыыр-араҥаччылыыр эрчимигэр бары кыһаллан, ытык өйдөбүлү чиҥэтиэх, сайыннарыах тустаахпыт.