- Кинигэҕэ Горнай улууһун II Атамай нэһилиэгин (1931 с. диэри Нам оройуонугар киирэрэ) Обутовтар, Кокоревтар төрүттэрин-уустарын, олохторун-дьаһахтарын, үтүө-мааны дьонун туһунан кэпсэнэр. Кинигэни Туйаара Дмитриевна Кокорева, Анна Лазаревна Сивцева, Матрена Афанасьевна Левина хомуйан оҥордулар. Бу кинигэ бэчээттэнэн тахсарыгар элбэхтик сүүрбүт-көппүт киһинэн биһиги биир дойдулаахпыт, РФ үөрэҕириитин туйгуна, Учууталлар учууталлара, Уус-Алдан Өнөр нэһилиэгин бочуоттаах олохтооҕо Агафья Павловна Лыткина буолар.
- Төрдү-ууһу ситимниир кэскиллээх «Өбүгэлэрбит ыллыктарынан» кинигэ сүрэхтэниитигэр нэһилиэкпит ытык кырдьаҕастара, Агафья Павловна бииргэ үөскээбит үөлээннээхтэрэ кэлэн кытыннылар. Ааптар мустубут дьоҥҥо кылгастык кинигэ ис тутулун, аймахтарын туһунан кэпсээтэ, кэлэр көлүөнэ өбүгэлэрин, кимтэн кииннээхтэрин, хантан хааннаахтарын, удьуордарын-аймахтарын билэ-көрө, ытыктыы сылдьалларыгар баҕарда, кэлбит ыалдьыттарыгар махтанан бэйэтин сэмэй бэлэхтэрин туттарда, тэрилтэ салайааччыларыгар «Өбүгэлэрбит ыллыктарынан» кинигэтин бэлэхтээтэ.
- СӨ үөрэҕириитин туйгуна, Учууталлар учууталлара Роза Васильевна Попова, сэрии сылларын оҕото Татьяна Яковлевна Обутова, СӨ тыатын хаһаайыстыбатын үтүөлээх үлэһитэ Александра Лазаревна Охлопкова, СӨ сибээһин үтүөлээх үлэһитэ Иннокентий Григорьевич Захаров уо.д.а. уруккуну-хойуккуну санастылар, ирэ-хото кэпсэттилэр, санааларын үллэһиннилэр. Бу күн сэрии кэминээҕи элбэх ырыа ылланна, баҕа санаа бастыҥа этилиннэ. Сэрии кэмин оҕолоро, тыыл, үлэ бэтэрээннэрэ «Хайыһар» ырыанан дьоро киэһэни түмүктээтилэр, өйдүү-саныы сылдьарга диэн хаартыскаҕа түстүлэр.
- Түгэнинэн туһанан, биир дойдулаахпытын Агафья Павловнаны үгүс сыллар тухары күүскүн-кыаххын биэрэн аймахтары түмэр, билиһиннэрэр үтүөкэннээх, кэскиллээх кинигэҥ күн сирин көрбүтүнэн биир дойдулаахтарын, аймахтарын ааттарыттан ис-сүрэхтэн эҕэрдэлиибин, доруобуйаны, дьолу-соргуну баҕарабын!
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети