Ньурба улууһун Мэҥэдьэк нэһилиэгэр оскуола үбүлүөйүн бэлиэтээтилэр, саҥа кинигэ сүрэхтэниитэ буолла (ФОТО)

Муус устар 3-4 күннэригэр Ньурба улууһун Мэҥэдьэк нэһилиэгэр Хатыы орто оскуолатын 85 сыллаах үбүлүөйүн бэлиэтээтилэр. Үбүлүөй тэрээһиннэрин чэрчитинэн, бу оскуолаҕа бэрт таһаарыылаахтык иитэр үлэҕэ завуһунан үлэлээбит Анатолий Ксенофонтов сырдык кэриэһигэр анаммыт «Спор, үлэ кэрэ кэрэһитэ» диэн Хатыы олохтоохторо хомуйан таһаарбыт ахтыы кинигэлэрин сүрэхтэниитэ буолла.


Тэрээһиҥҥэ Дьокуускайтан «Бичик» кинигэтин кыһатын дириэктэрэ Август Егоров, кылаабынай редактор Валерий Луковцев, саха народнай поэта Иван Мигалкин уонна суруйааччы Иван Осипов – Уйбаан Ойуур күүтүүлээх ыалдьыт буолан сырыттылар.
Ньурба улууһун баһылыгын Борис Попову уонна Дьокуускайтан ыҥырыллан кэлбит күндү ыалдьыттары Хатыы Культуратын дьиэтигэр сахалыы таҥастаах кыргыттар уонна уолаттар чороонноох кымыһынан, алаадьынан айах тутан күндүлээтилэр. Оскуола дириэктэрэ Анастасия Семенова уонна Ньурба улууһун баһылыга Борис Попов, Мэҥэдьэк нэһилиэгин баһылыга Иван Егоров, үөрэх управлениетын салайааччы Маргарита Маччасинова, «Бичик» кыһатын дириэктэрэ Август Егоров, кылаабынай редактора Валерий Луковцев, народнай поэт Иван Мигалкин уонна «Чолбон» сурунаал редактора, суруйааччы Иван Осипов- Уйбаан Ойуур мустубут дьону эҕэрдэлээн тыл эттилэр.
Ил Түмэн Махтал суруктара Розалия Егороваҕа уонна Мария Федороваҕа туттарылынна, СР үөрэҕириитин туйгуна аат Ирина Васильеваҕа, Людмила Макароваҕа иҥэрилиннэ, СР Суруйааччыларын союһун В.В. Никифоров-Күлүмнүүр аатынан үрдүкү наҕараадатынан оскуола дириэктэрэ Анастасия Семенова, Учууталлар учууталлара бэлиэнэн Мария Кононова уонна Сыному Чой наҕараадаланнылар.
Оскуола үбүлүөйүгэр анаммыт тэрээһиннэр киэҥ далааһыннаахтык ыытылыннылар. Араас көлүөнэ үөрэнээччилэр мустаннар аһаҕас уруоктарга сырыттылар, баай уопуттарын үллэһиннилэр, үөрэнээччилэр прикладной быыстапкаларыгар сырыттылар, ирэ-хоро сэлэстилэр. Учууталлар уонна оскуола үөрэнээччилэрэ кыттыылаах кэнсиэри биһирии көрдүлэр.

Кулун тутар 4 күнүгэр СР физическэй культуратын туйгуна, спорт национальнай көрүҥнэрин маастардара, ырыаһыт, хоһоонньут, чөл олох пропагандиһа, иитэр үлэҕэ завуһунан үлэлээбит Анатолий Ксенофонтов сырдык кэриэһигэр анаммыт «Спорт, үлэ кэрэ кэрэһитэ» ахтыы кинигэтин сүрэхтэниитэ олус истиҥник, долгутуулаахтык ааста.
Бииргэ үлэлээбит үөлээннээхтэрэ иһирэх ахтыылары оҥордулар, Анатолий бэйэтэ суруйбут хоһооннорун аахтылар, ырыаларын ыллаатылар. Манна «Бичик» кинигэ кыһатын салалтата уонна икки Суруйааччылар союзтарын суруйааччылара кыттыыны ыллылар көрөөччүлэр болҕомтолорун тартылар, сүргэлэрин көтөхтүлэр.