Бу күн РФ уопсай үөрэхтээһинин бочуоттаах үлэһитэ, СР үөрэҕириитин туйгуна Софья Дмитриева таптыыр, ытыктыыр кэргэнин Андрей Дмитриевич, ону сэргэ кини үлэлээбит тэрилтэтин, бүтүн улууһу аатырдыбыт «Сельхозтехника» холбоһугун туһунан бэртээхэй кинигэни таһаартарда. Иһирэх түһүлгэни «Хара нэһилиэгэ» МТ баһылыга Дария Назарова иилээн-саҕалаан ыытта.

Андрей Дмитриевичтиин бииргэ алтыспыт, кинини күндүтүк саныыр, ытыктыыр дьон музей быыстапкалыыр саалатыгар толору муһуннулар. Онон, кырдьык даҕаны, чахчы чаҕылхай киһи төрөөн-үөскээн ааспыт эбит диэн итэҕэйэҕиҥ. Софья Гаврильевна кинигэ тахсарыгар үлэлэспит, көмөлөспүт дьоҥҥо махталын тиэртэ.

Андрей Дмитриев туһунан бииртэн биир үтүө тыллар этилиннилэр. Саха туризмын төрүттээбит, «Сельхозтехникаҕа» бииргэ үлэлээбит доҕоро Василий Атласов: «Аттыбытыгар өрүү таптыыр кэргэннэрбит баар буоланнар, кинилэр өйөбүл буоланнар, үгүһү ситиспиппит», - диэн эттэ. Бииргэ үлэлээбит атаһа Василий Окороков: «Андрей Дмитриевич үлэҕэ бэрээдэктээх буолууну ирдиирэ. Ону мин олохпор күн бүгүҥҥээҥҥэ диэри тутуһабын. Мэҥэни Мэҥэ дэппит «Сельхозтехника» холбоһугун мастарыскыайыгар станоктар билигин даҕаны тураллар, баҕалаах ыччаттар кэллэхтэринэ толору үлэлиир кыахтаахтар», ‒ диэтэ.

«Ытык сүбэ» бэрэссэдээтэлэ Василий Эверстов: «Андрей Дмитриевич бары өртүнэн чаҕылхай этэ. Маннык Герой дьоммутун үйэтитиигэ, кинилэри холобур оҥосторго улууспут салалтата кэлэр көлүөнэҕэ күүскэ сырдатар үлэни ыытыан наада», ‒ диэн санаатын үллэһиннэ.

Улуус баһылыгын солбуйааччы Иван Птицын, сиэн быраата, СР үтүөлээх тутааччыта Святослав Докторов, СР Суруналыыстарын союһун чилиэнэ Анна Климентова, «Сельхозтехника» холбоһугун 13-с салайааччыта Иосиф Ноговицын, 50 сыл анараа өртүгэр Майа орто оскуолатын бүтэрбит, бииргэ үөрэммит сэттэ доҕоро, атастара Андрей Морозов, Авксентий Филиппов, таайа, педагогическай үлэ ветерана Иннокентий Никитин, армияҕа бииргэ сулууспалаабыт табаарыстара истиҥ ахтыылары оҥордулар, Софья Гаврильевнаҕа кинигэни бэлэмнээн таһаартарбытын иһин махталларын тиэртилэр. В.П.Ларионов аатынан Майа орто оскуолатын, Майа лицейин үөрэнээччилэрэ «Сельхозтехника» туһунан дакылааттары аахтылар, Владимир Кузьмин «Айхал, үлэ дьонугар» диэн ырыаны бэлэхтээтэ.

Музейга «Үлэһит Өндүрэй үйэлээх мөссүөнэ» диэн Андрей Дмитриевич үлэлээбит сылларын билиһиннэрэр быыстапка туруорулунна.