Сонун кинигэни РФ Суруналыыстарын союһун чилиэнэ, СӨ Духуобунаһын академиятын иһинэн үлэлиир Ыал культуратын киинин тэрийээччи Любовь Аргунова уонна СӨ Суруйааччыларын союһун чилиэнэ Иван Тарабукин бэлэмнээбиттэр.

Саха дьахталларыттан биир бастакынан айар үлэ умсулҕаннаах дьарыгар ылларбыт поэтесса Марфа Куличкина баара буоллар быйыл сайын 85 сааһын туолуо этэ.

Марфа Куличкина хоһооннорун уонна ырыаларын биир дойдулаахтара Илья Скрябин «Үрүҥ түүл» (1991 с.) уонна Иван Тарабукин «Сүүнэ тыл сүмэтин булларбыан» (2006 с.) кинигэлэргэ түмэн таһаарбыттара. Ол кинигэлэр билигин «остуол кинигэлэринэн», ыллам ырыанньыктарынан биллэллэр.

Көрсүһүүгэ кэлбит дьон 200-чэ хоһоон (ол иһигэр 50-ча ырыа) ааптара Марфа Куличкина айар үлэтэ билигин да дьоһун сыанабылы ситэ ылбакка сылдьарын бэлиэтээтилэр.

СӨ норуотун хаһаайыстыбатын үтүөлээх үлэһитэ Родион Федоров: «Марфа Куличкина бу Орто дойдуга суох буолбутун эрэ кэннэ, кини хоһоон суруйара биллибитэ. Боростуой таҥастаах-саптаах, олус сэмэй, интернат сэбиэдиссэйэ киһи нарын дууһалаах лиирик буолуо диэн санаан да көрбөт этибит... Биир дойдулаахпыт Марфа Куличкина аатынан куонкуруһу 2-3 сыл буола-буола тэрийэрбит эбитэ буоллар, кини аатын үйэтитиэ этибит», – диэн баҕа санаатын эттэ. Манна сыһыаран эттэххэ, Төҥүлү интернатыгар кини аата иҥэриллэн, биир дойдулаахтара олус үөрбүттэрэ.

Төҥүлү кулуубун уус-уран салайааччыта Афанасий Борисов, Төҥүлү ытык кырдьаҕаһа Егор Захаров, Платон Слепцов, Анатолий Павлов-Дабыл, Саргылаана Гольдерова, Любовь Сорокина, Елена Архипова, Валентина Семенова, Георгий Белоусов уо.д.а. нарын дууһалаах поэт олорон ааспыт олоҕун истиҥник-иһирэхтик аҕыннылар, ырыа буолбут хоһооннорун анаан ырытар наадатын туһунан эттилэр.

Марфа Куличкина хоһоонноругар Валерий Ноев, Аркадий Алексеев, Виктор Никаноров, Денис Данилов, Галина Шахурдина, Николай Сорокин уо.д.а. ырыа айбыттара. Бу күн Лена Керемясова Аркадий Алексеев матыыбыгар «Эйиэхэ», «Этигэн хомус» быйылгы номинана Константин Степанов – Чүмэчи матыыбыгар «Сибэкки биэрээри», Николай Сорокин уола Айгылаан «Мин ийэм» уонна «Эн миэхэ» диэн ырыалары толорон саҥалыы тыыннаатылар.

Саргылаана Гольдерова бэлиэтээн эппитинии, «ол кэм соруктарын толорбут поэты саныырга хаһан да хойут буолбатах».

Көрсүһүү кыттыылаахтара Марфа Куличкина ырыаларын көй салгыҥҥа көтүппүт, кини туһунан ахтыылары дьоҥҥо тириэрдибит Любовь Семеновна Аргуноваҕа ис сүрэхтэриттэн махтаннылар.