Дьоро киэһэни эдэр поэттар, коллегалар Александра Попова уонна Рустам Каженкин иилээн-саҕалаан ыыттылар. 

Аҕа саастаах суруйааччылар тахсан поэт хоһооннорун доргуччу ааҕа-ааҕа ырыттылар. Поэт, суруйааччы «Чолбон» сурунаал кылаабынай редактора Николай  Винокуров-Урсун «Кэччэгэй дьахтар алаадьыта куруук чараас буолар диэн этэллэр, оттон бу кинигэ төһө да чараас алаадьы тэҥэ буоллар, олус миинньигэс уонна тотоойу алаадьы», - диэн эттэ. Урсун кэнниттэн поэт Иван Мигалкин тахсан: «Дьөгүөр тыл кубулҕатыгар уһуйулунна» диэн этиитин поэзия киэҥ куйаара биллибэт эйгэтигэр ыҥырыы, ылыныы курдук буолла. Дьон тыл этиитин быыһыгар культура колледжын устудьуоннара хомустаан, хоһоон ааҕан доллоһутан бэркэ сэргэхситтилэр.

Түһүлгэ буруйдааҕа Егор Старостин-Байаҕантай бииргэ устудьуоннаабыт куурсун оҕолоро, физик-математик идэлээх дьон бары кэриэтэ кэлбиттэр. Бу куурус оҕолорун кэккэлэригэр «Сахабазальт» генеральнай директора Егор Жирков эмиэ баар. Кини доҕоругар эҕэрдэтин эмиэ уратытык «Мин эмиэ Дьөгүөрбүн...» диэн саҕалаата. Биэчэри Байаҕантай балта Күн Арылы  эҕэрдэ ырыаларынан ордук киэргэттэ.

Куораппытыгар элбэх кинигэ сүрэхтэнэр. Ол эрээри, маннык элбэх дьону түмэн, сахалыы истиҥ көрсүһүүлэр буолбатахтара ырааппыт курдук. Суруналыыс, поэт Гаврил Андросов: «Байаҕантай түһүлгэлээх поэт эбит», - диэтэ.

Мустубут дьон кинигэ сүрэхтэниитигэр сылдьан, итии үүттээх чэйи астына иһэн, билэр дьонун кытта ирэ-хоро сэлэһэн, саха тэҥэ суох сананна.