Иитээччи Валентина Атакова эппитинэн, барыта кини Никита Новгородовтыын Кыайыы 70 сылыгар киинэ устарга санаммыттарыттан саҕаламмыт. Валентина Егоровна суруйааччы Уйбаан Бахсылыырап кэпсээнинэн сценарий суруйбут. Режиссерунан Никита Новгородов буолбут. Оруолларга кимнээх оонньуулларын быһаарбыттара, уопсай сыаналарга «Сырдыкчаана» уһуйаан иитиллээччилэрэ кыттыбыттара. Сүрүн герой Түмэппий уол оруолун 7 саастаах Кеша Неустроев толордо. Кини кэнсиэрдэргэ көхтөөх кыттааччы: ыллыыр, үҥкүүлүүр, хоһоон ааҕар. Кеша 2014 с. иитээччи Айталина Черноградская салалтатынан кэтэхтэн ыытыллыбыт Бүтүн Россиятааҕы «Арифметика королеватыгар» викторинаҕа бастакы миэстэни ылбыта. Соторутааҕыта «Аман өс» республикатааҕы куонкурус дипломанынан буолбута.

Киинэҕэ Түмэппий уол аҕатын - Евгений Егоров, ийэтин – Айталина Черноградская, балтын – 3 саастаах Эйэлиинэ Егорова оонньоотулар. Бырайыакка актыыбынай кыттыыны үлэ бэтэрээннэрэ – Сыромятниковтар дьиэ кэргэн ыллылар. Түмэппий кырдьан олорорун - Николай Федорович, эбэлэрин – Тамара Васильевна, Иван Иванович Никитин – Баһылай оҕонньору оонньоотулар. Киинэ түмэлгэ уонна айылҕаҕа – тыаҕа уонна күөлгэ уһулунна.

Сюжет быһыытынан ыал аҕата сэриигэ барар, кинини төһө күүһэ тиийэринэн 8 саастаах уола Түмэппий солбуйар. Кини Баһылай оҕонньордуун куйуурунан собо баһан таһаарбыттара уолга хайдах курдук үөрүүлээҕин, дьиэ кэргэҥҥэ улахан аһылык буолбутун көрдөрөллөр. Уол чааркааныгар иҥнибит кырынаас тириитин дьиэнэн нолуокка туттарарга былаанныыллар. Ийэлэрэ чүмэчи сырдыгар аҕалара сэрииттэн суруйбут суругун ааҕар сцената баар.

Киинэни «Сырдыкчаана» уһуйаан үбүлээбит. Кириэс Халдьаайытааҕы кыраайы үөрэтэр музейга (директор С.Д. Матаркина) уонна олохтоохторго көмөлөрүн иһин, ону таһынан киинэ оҥоһуутугар көмөлөспүт дьоҥҥо махтаналлар.

Киинэни оҥорооччулар оччотооҕу кэм тыынын биэрэргэ дьулуспуттар. Ол курдук, сорох кадрдар саха балаҕаныгар уһуллубуттар, былыргы саха иһиттэрэ көстөллөр. Собону уонна дьиҥнээх кырынааһы уонна сөптөөх көстүүмнэри булбуттар. Оҕо уһуйаанын сэбиэдиссэйэ Альбина Николаева бэлиэтииринэн, улахан көмөнү Сыромятниковтар уонна Неустроевтар дьиэ кэргэттэрэ оҥорбуттар. Кинилэр киинэҕэ наадалаах бары маллары-саллары булан биэрбиттэр.

Киинэ сүрэхтэниитигэр дьон бэйэлэрин санааларын эттилэр. Киинэни оройуоҥҥа эрэ буолбакка, республикаҕа кытта тарҕатарга, «Саха» НКИК киэҥ аудиторияҕа көрдөрөрүгэр этии киллэрэргэ эттилэр. Баҕалаахтар киинэ уһуллубут диискэтин булунуохтарын сөп. Баҕар, сотору кэминэн киинэ салгыыта уһуллуон сөп. Киинэҕэ кыра-кыра итэҕэстэр бааллар. Ол эрээри уһуйаан иитиллээччитэ кыыс: «Өссө көрүөҕүҥ», - диэбитэ улаханы этэр.