1993 сылтан Оҕо искусствотын оскуолата Халыма бастакы композитора Алексей Созонов аатын сүгэр. Онон Алексей Николаевич дьиэ кэргэнэ үбүлүөйүнэн сибээстээн музыка эйгэтигэр үөрэнэр оҕолорго стипендия олохтоото. Ону оскуола бастыҥ үөрэнээччилэрэ Коля Лащик уонна Артём Петров ыллылар. Бэлиэтээн эттэххэ, кинилэр тохсунньу 11 күнүгэр ыытыллар „Саҥа ааттар“ диэн пианистар куонкурустарыгар кыттарга бэлэмнэнэ сылдьаллар.

Быйыл Култуура сылынан култуура управлениета оскуолаҕа үп көрбүтэ. Онон үлэһиттэр фортепиано, 2 компьютер уонна акустическай установка ылыммыттар. Маны таһынан „Музыка для всех“ бырагырааманан Култуура министиэристибэтиттэн эмиэ үп көрүллүбүт.

Үөрүүлээх киэһэ иккис чааһыгар наҕараадалары туттарыы буолла. Орто Халыма улууһун сайдыытыгар кылаатын иһин Валентина Стручкова уонна Евдокия Лаптева өйдөбүнньүк бэлиэнэн, үтүө суобастаах үлэлэрин иһин Людмила Бандерова, Татьяна Кузьменко уонна Альбина Горохова грамоталарынан наҕараадаланнылар. Народнай театр махтал суругун Евдокия Лаптева, улуустааҕы култуура управлениетын махтал суругун Татьяна Горохова уонна Фаина Степанова, грамотатын Вероника Шустикова, Надежда Григорьева, Алексей Созонов туттулар. Валентина Слепцоваҕа уонна Евдокия Лаптеваҕа Култуура министиэристибэтин бочуотунай грамотата, Валентина Стручковаҕа Ыччат политикатын министиэристибэтиттэн махтал сурук туттарылынна. „СР култууратын туйгуна“ бочуоттаах бэлиэнэн Альбина Горохова наҕараадаланна.

Бу күн элбэх истиҥ-иһирэх тыл этилиннэ, бэлэх туттарылынна. Ол курдук, улуус дьаһалтатыттан 10 тыһыынча суумалаах сертификат бэрилиннэ. Куорат дьаһалтата, „Кулума“ сынньалаҥ киин, улуустааҕы гимназия уонна төрөппүттэр бэйэлэрин бэлэхтэрин туттардылар. Үлэһиттэр уонна үөрэнээччилэр баҕа санаалара — саҥа оскуола тутуллуута — хайаан да туоларыгар эрэннэрдилэр.