Чаҕылхай күннээх халлаан туран биэрэн дьон-сэргэ үөрүүтэ-көтүүтэ үрдээтэ. Бу күн оскуола үөрэнээччититтэн саҕалаан тэрилтэ үлэһиттэрэ бука бары Аҕа дойду Улуу сэриитин саллааттарын таҥаһын-сабын кэтэннэр, сэлиэнньэ киин уулуссатынан «Ураа!» хаһыынан колонналарынан хаамсыбыттара уратытык көһүннэ. Дьэрэкээн шаардар, сибэккилэр, байыаннайдыы симэммит массыыналар, бэл таанкалар бааллара. Майинскай уулусса кытыыларынан сэрии сылларын ахтан-санатан ааһар театрализованнай көрдөрүүлэр параакка кыттааччылар болҕомтолорун тартылар. Кыһыл Аармыйа атаакаҕа киириитэ, эйэ-дьол иһин тыылга көлөһүннэрин тохпут дьахталлар, нуорманан бэриллэр килиэпкэ уһун унньуктаах уочарат уо.д.а. интэриэһинэй хартыыналар илэ баардыы көһүннүлэр.

Буойуттар монуменнарыгар үөрүүлээх митиҥҥэ ытык ветераммыт, Аҕа дойду Улуу сэриитин 2-с степеннээх уордьанын кавалера, «Японияны кыайыы иһин» мэтээллээх, улуус, Майа сэлиэнньэтин бочуоттаах гражданина Иван Николаевич Иванов эдэр көлүөнэҕэ бэйэтин алгыһын уоттаах-төлөөннөөх тылынан тиэртэ. «Убайдарбыт, аҕаларбыт, оччолорго эдэркээн уолаттар,  ынырыктаах сэриигэ бэйэлэрин харыстаммакка эйэлээх олох туһугар кыргыспыттарын хаһан да умнумаҥ!», ‒ диэн баҕа санаатын эттэ. Киниэхэ бу күн «СР Бочуоттаах ветерана» аат иҥэрилиннэ.  

Улуус баһылыгын социальнай боппуростарга солбуйааччы Иван Птицын, оройуон Сэбиэтин бэрэссэдээтэлэ Андрей Находкин, СР байыаннай комиссариатын Мэҥэ-Хаҥаластааҕы отделын начальнига Айаал Петров, «Майа сэлиэнньэтэ» МТ баһылыгын солбуйааччы Никита Никитин, ыччаттар ааттарыттан В.П.Ларионов аатынан Майа орто оскуолатын учуутала Федор Белолюбскайэҕэрдэ тыл эттилэр.

Бырааһынньыгы 59-с культура уонна спорт эстафетатын кыайыылаахтара «Барҕа махтал эһиэхэ» диэн бэртээхэй концерынан салҕаатылар, Ф.Г.Охлопков аатынан Майа орто оскуолатын, Майатааҕы лицей, В.П.Ларионов аатынан оскуола коллективтара уонна үөрэнээччилэрэ кыайыыны уһансыбыт буойуттарга, сэрии ыар сылларыгар суох буолбут саллааттарга муҥура суох махталларын анаатылар, кинилэр олохторун салгыахпыт, ыра санааларын толоруохпут, иллээх-эйэлээх буолуохпут диэтилэр, ырыа-тойук, үҥкүү бэлэхтээтилэр.