Быйылгы Оҕо көмүскэлин күнүн бырааһынньыга «Нам улууһа» МТ ыччат уонна дьиэ кэргэн управлениетын, «Ленскэй нэһилиэк» МТ дьаһалтатын, А. Шестаков аатынан Сынньалаҥ киинин, үөрэх уонна культура управлениеларын тэрийиилэринэн М.К. Аммосов болуоссатыгар тэрээһиннээхтик ыытылынна.

Сарсыарда 11 чааска нэһилиэк оҕо саадтарын иитиллээччилэрэ араас киэргэтиилээх, шардардаах, сибэккилэрдээх колонналарынан үөрэ-көтө парадтаатылар. Үөрүүлээх тэрээһиҥҥэ кыттыбыт улуус олохтоохторун, төрөппүттэри, оҕолору «Нам улууһа» МТ баһылыгын солбуйааччы Инна Сивцева, үөрэх управлениетын начальнига Олег Протопопов, ыччат уонна дьиэ кэргэн управлениетын начальнига Татьяна Степанова, «Ленскэй нэһилиэк» МТ баһылыга Андрей Новгородов эҕэрдэлээтилэр.

Тэрийээччилэр бастыҥ киэргэтиилээх колоннаҕа, дьиэ кэргэнинэн көстүүмнээхтэргэ, коляскаларын киэргэппит дьоҥҥо бириистэри туттартаатылар.

Колонналары көрүүгэ «Сулусчаан» оҕо саада бастакы миэстэни ылла (сэбиэдиссэй М.И. Сивцева). Коляскалары киэргэтиигэ: бастакы миэстэ - Сидоровтар дьиэ кэргэн (Коля, Аня уонна эбэлэрэ Мария Стручкова) «Санта Клаус» тематыгар; иккис миэстэ Колодезниковтар дьиэ кэргэн (Айаана уонна ийэтэ Виктория Колодезникова) Улуу Кыайыы 70 сылынан «Мини-танкистар» диэн тематыгар; үһүс миэстэ Федоровтар дьиэ кэргэн (Артем уонна ийэтэ Айталина Федорова) «Улуу Кыайыыны уһансыбыт үрүҥ халааттаах аанньаллар» теманан кытыннылар.

«Бастыҥ оонньуур площадка» куонкуруска «Кустук» (сэбиэдиссэй Ф.Т. Данилова), «Кэскил» (сэб. Е.К. Харитонова), «Кыталык» (Т.Н. Ядрихинская) оҕо саадтара миэстэлэстилэр.

Оҕолор төрөппүттэрин кытта кыттыбыт уруһуй куонкурсугар Галя Яковлева («Туллукчаан» оҕо саада), Лилия Попова («Көлүкэчээн»), Юлия Атласова («Кэнчээри») бастаатылар.

Литературнай геройдар куонкурустарыгар бастыҥынан «Чэчир» оҕо саада (сэбиэдиссэй И.В. Охлопкова) ааттанна. «Мин таптыыр литературнай геройум» диэн күрэскэ «Микки Маус» - Евгения, Артем Ивановтар бастакы, «Король уонна королева» - Семен, Варвара Чемезовтар иккис, «Тойон ыҥырыа уонна ийэ» - Елена, Дина Беккердэр үһүс миэстэлэри ыллылар.

Үөрүүлээх чаас кэнниттэн уһуйааннар иитиллээччилэрэ улахан кэнсиэр көрдөрдүлэр. Нэһилиэк ыччаттара, «Бининс» педагогтар этэрээттэрэ араас оонньуулары ыыттылар, үҥкүүлээн көрдөрдүлэр.

Күнүс икки чаастан А. Шестаков аатынан Сынньалаҥ киинигэр «Үҥкүүлүүр оҕо саас» диэн оҕолор, ыччаттар кэнсиэрдэрэ буолла. Бу күн Доҕордоһуу болуоссатыгар фонтан үлэлээтэ. Киэһэ 5 чааска куораттан кэлбит «Центр развития семейного устройства и социализации детей-сирот и детей, оставщихся без попечения родителей» ГКУ үлэһиттэрэ «Ийэм көрдүн, ийэм кэллин» диэн иһитиннэрэр-биллэрэр акцияны тэрийэн ыыттылар. Ыалдьыттарбыт бу күн Хатыҥ Арыы уонна Хамаҕатта нэһилиэктэригэр сылдьан эмиэ маннык акцияны тэрийдилэр.