Айыы Кыһатыгар Ырыа күнүн бэлиэтээтилэр

Ыам ыйын 23-гэр – республика үрдүнэн Ырыа күнэ бэлиэтэнэр. Бу үтүө кэми мүччү туппакка, биллэр мелодист А.К.Калининскай-Луҥха Өлөксөйө көҕүлээһининэн, Айыы Кыһатын музыкаҕа учуутала П.О.Липатов бэлэмнээһининэн – 1-10 кылаас оҕолоро 532 киһилээх хор туруоран, Саха Өрөспүүбүлүкэтин Өрөгөйүн ырыатын, “Саргыбыт сайыннын” (К.Уткин тыллара, А.Калининскай музыката), Айыы Кыһатын өрөгөйүн ырыатын уонна “Ырыа күнэ” (Х.Горохов тыллара, А.Калининскай музыката) диэн музыкальнай айымньылары толорон, Дьокуускай куоракка Ырыа күнүгэр аналлаах республикатааҕы тэрээһиннэри саҕалаатылар.

Оскуола директора Л.П.Шамаева киирии тылыгар, хас биирдии оҕо ырыа күнүгэр кыттан Кэрэҕэ чугаһыырын, онуоха оскуола сэһэнин үс кыттааччыта – учуутал, оҕо, төрөппүт бааллара олус кэрэхсэбиллээҕин бэлиэтээтэ. Оттон тэрийээччи А.К.Калининскай Айыы Кыһата аан бастаан Ырыа күнүн бу күн саҕалаабыта, Ырыа күнэ оҕо ыллыырыттан саҕаламмыта олус улахан иитэр-үөрэтэр, бэлиэ буолар суолталаахдиэн эттэ.

Оскуола дэгиттэр учуутала, РФ спордун туйгуна З.И.Федоров музыка эйгэтигэр кэлиҥҥи кэмҥэ сыһыан уларыйан эрэриттэн, “Музыка барыбытыгар” бырайыак салгыы сайдарыттан үөрэрин туһунан санаатын үллэһиннэ.

Хор иннинэ бэйэлэрин ыллам ырыаларынан көмүс куоластаах оҕобут Павлова Айсена уонна киэн туттар ырыаһыт төрөппүппүт Илья Николаев ыллаан, дьон кутун-сүрүн туттулар.

Оҕолор ырыа бүппүтүн кэннэ ыйыталастахха олус үөрбүттэрин, бастаан утаа төрөппүттэрэ көрөн туралларыттан долгуйбуттарын этэллэр. Түгэнинэн туһанан, оҕолору музыка учууталын кытта тэбис-тэҥҥэ сылдьан бэлэмнэспит бары кылаас салайааччыларыгар, “Саргыбыт сайыннын” ырыа солистарыгар – З.И.Федоровка, Л.С.Острельдинаҕа, тыаспытын-ууспутун кыайа туппут В.А.Слепцовка, бука бары кэлбит төрөппүттэрбитигэр барҕа махталбын тиэрдэбит.

Эһиилги Ырыа күнүгэр көрсүөххэ диэри!