Хаандыгаҕа Республика күнүн бэлиэтээтилэр

Томпо улууһун киинигэр Хаандыгаҕа Саха Республикатын күнүн Хаандыгатааҕы хайа-геологическай техникумҥа бэлиэтээтилэр.


Эҕэрдэ тылы улуус баһылыга Георгий Герасимов эттэ. Кини СР Правительствотын грамотатын Томпотооҕу Гостехнадзор кылаабынай инженер-инспекторыгар Виталий Скрябиҥҥэ, улуус дьаһалтатын грамоталарын дьаһалта үлэһиттэригэр Лариса Жердеваҕа, Людмила Подобрееваҕа, хайа-геологическай техникум директорыгар Михаил Неустроевка туттарда. «Манчаары» Культура дьиэтин режиссера Тамара Волкова уонна библиотекарь Римма Захарова «СР культуратын туйгуна» үрдүк аатынан бэлиэтэннилэр.
Кыайыы 70 сылыгар анаммыт сэрии туһунан ырыа куонкуруһугар 13 хор уонна ансаамбыл, барыта 260 киһи кытынна. Гран-прини Хаандыга орто оскуолатын учуутала Виктор Сидельцев «Память» ырыаны толорон ылла. I степеннээх лауреатынан Хаандыгатааҕы хайа-геологическай техникум хора буолла. Манна директор уонна директоры солбуйааччылар, преподавателлэр, студеннар кытыннылар. Кинилэр «Бухенвальдский набат» ырыаны толордулар. Хаандыгатааҕы оҕо искусствотын оскуолата II степеннээх лауреатынан, «Мишутка» уһуйаан иитээччилэрэ III степеннээх лауреатынан буоллулар. Кыайыылаахтарга грамоталар уонна харчынан бириэмийэлэр туттарылыннылар.
Норуоттар икки ардыларынааҕы куонкурустар кыайыылаахтара «Ахтылҕан» эр дьон ансаамбыла күрэһи таһынан кыттан «Тыыннаахтар умнубат сыллара» ырыаны толордо. Бүтэһигэр кыттааччылар бары «День Победы» ырыаны өрө көтөҕүллүүлээхтик ыллаабыттарын көрөөччүлэр - араас омук дьоно — сүһүөхтэригэр туран бииргэ ылластылар.