Петр Алексеев Республика Ил Дарханын, республика правительствотын аатыттан эҕэрдэтин тириэртэ. Маннык митиннэри респкублика чулуу уолаттарын дойдуларыгар ыытыы үтүө үгэскэ кубулуйан эрэр диэн бэлиэтээтэ: "Автономия төрүттэнэрин саҕана ууруллубут олуктар күн бүгүн салгыы республика, улуус салалтатынан ыытыллалларын тоһоҕолооон бэлиэтиэхпин наада. Эрэнэбит, биир дойдулааххыт И.Н.Барахов аатын өрө тутаҥҥыт,  инники үлэҕит-хамнаскыт дьон-сэргэ олоҕо тупсарын, тыа сирэ, үөрэхтээһин, социальнай эйгэ тэтимнээхтик сайдалларын туһугар ыытыллыаҕын. Кытаанах доруобуйаны, ситиһиини, улуус сайдарын туһугар бары күүскүтүн, өйгүтүн-санааҕытын түмэн салгыы түмсүүлээхтик үлэлиэххит, хамсыаххыт".

Ил Түмэн мандатнай уонна регламеҥҥа комиссиятын председателэ Марфа Филиппова саха чулуу уолаттарын дойдуларыгар тиийэн маннык сүгүрүйүүнү ыытыы миитин кыттыылаахтарыгар долгутууну үөскэтэрин бэлиэтээтэ. Депутат үлэтэ дьон-сэргэ олоҕо тупсарыгар, доруобай-чэгиэн буоларыгар туһуланарын санатта.

Ил Түмэн депутата Гаврил Алексеев Республика күнүнэн эҕэрдэлээтэ уонна И.Н.Барахов дойдутугар Харбалаахха иккистээн кэлэн турабын диэн эттэ. Республика 100 сылыгар бэлэмнэнии үлэ бара турарын, саха чулуу уолаттарын үйэтитэр миитиҥҥэ кыттарбыттан үөрэбин диэтэ.

«Үөһээ Бүлүү» улууһа МТ баһылыга Владимир Поскачин И.Н.Барахов саха норуотун кыргыыттан быыһаабыт түгэнин, 1922 сыл кулун тутар 10-11 быһаарылаах күнүн, туһунан кылгастык билиһиннэрдэ.

"Харбалаах нэһилиэгэ" МТ баһылыга Кузьмин И.И. Саха сирин салайбыт чулуу уолаттар сүүрбэччэлээх эрэ этилэр, онон Саха сирин кэскилэ эдэр ыччакка диэтэ.

Миитиҥҥэ Н.Якутскай аатынан оскуола оҕолоро литературнай дьүhүйүү кердердүлэр, хоhоон аахтылар, «Сахам сирэ барахсан” ырыа ыаллаатылар уонна «Бараахап туһунан ырыаны» СР культураҕа туйгуна А.П.Дмитриева-Иванованы кытта ыллаатылар.

И.Н.Барахов мэҥэ тааһыгар ыраахтан кэлбит ыалдьыттар, олохтоохтор тыыннаах сибэкки дьөрбөтүн уурдулар.

СР Правительствотын председателин солбуйааччы Петр Алексеев салайааччылаах делегация И.Н.Барахов аатынан СР Судаарыстыбаннаһын историятын музейын экспозицияларын көрдүлэр. Салгыы общественноһы кытта көрсүһүү Үөһээ Бүлүүгэ буолуоҕа.

Людмила Петрова хаартыскаҕа туhэриилэрэ