Хаандыгаҕа Кыайыы күнүн өрө көтөҕүллүүлээхтик бэлиэтээтилэр

Хаандыгаҕа Кыайыы күнүгэр болуоссакка элбэх киһи муһунна. Бу норуот бырааһынньыгар сэрии кыттыылаахтара Калабина Любовь Николаевна, Баженова Ирина Прокопьевна, сэрии бэтэрээннэрин огдооболоро Н.А. Базиленко, В.М. Корнилова, тыыл, үлэ бэтэрээннэрэ уонна сэрии оҕолоро кытыннылар.


Улуус уһуйааннара, оскуолалара Кыайыы былааҕын көрсөн чиэстээбиттэрэ уонна бэйэлэрин тэрилтэлэрин аата суруллубут лоскуйдары эбии тигэн биэрбиттэрэ. Былааҕы Кыайыы күнүгэр Герой Ф.М. Охлопков музейыгар туттарар чиэс Хаандыга орто оскуолатын уонна гимназиятын бастыҥ үөрэнээччилэригэр К. Рудыхха, О. Ермоловаҕа, А. Жирковка, Г. Чекуроваҕа, А. Илларионоваҕа тигистэ.
Махтал тылларын оройуон баһылыга Георгий Герасимов, Хаандыга бөһүөлэгин баһылыга Михаил Алексеев, РФ ИДьМ Томпотооҕу отделын начальнига Лев Артемьев, сэрии кыттыылааҕа Иван Смольянов уола, Хаандыга оскуолатын выпускнига Александр Смольянов эттилэр. СР Правительствотын, биир дойдулаахтарбыт телеграммалара ааҕылыннылар.

Кыргыһыы хонуутугар охтубут буойуннар сырдык ааттарын биир мүнүүтэ чуумпуран кэриэстээһин кэнниттэн Герой Федор Охлопков пааматынньыгар уонна самолеттары тиэрдээччи летчиктар пааматынньыктарыгар, Герой Владимир Лонгинов уонна Албан Аат уордьан толору кавалера Иван Околович өйдөбүнньүк дуоскаларыгар гирляндалары уонна сибэккилэри уурдулар. Автоматтарынан салют ыттылар, шаардары халлааҥҥа көтүттүлэр.

Военкомат отделын начальнига Сергей Кулишов парады аста. Болуоссатынан полиция, ЫБММ, нолуок инспекциятын, пристав сулууспатын коллективтарын колонналара стройунан хаамтылар. Оройуоннааҕы "Снежный барс" военнай-патриотическай оонньуу кыайыылаахтара - гимназия уонна орто оскуола үөрэнээччилэрэ - ырыаҕа уонна стройга үөрүйэхтэрин көрдөрдүлэр. Орто сүһүөх кылаастар үөрэнээччилэрэ - "Зарница" оонньуу кыайыылаахтара хаамыстылар. "Улуу норуот улуу кыайыыта" диэн театрализованнай көрдөрүү дьон болҕомтотун тарта.

Стадиоҥҥа үгэс буолбут эстафета ыытылынна. Манна оскуола оҕолоругар үс бастакы миэстэни гимназия оҕолоро ыллылар. Улахан дьоҥҥо эмиэ бу үөрэх тэрилтэтин үрдүкү кылааһын оҕолорун хамаандалара бастакы уонна үһүс мисэтэлэри ыллылар. Иккис миэстэҕэ «АЛРОСА» СКК хамаандата таҕыста.
Киэһээ болуоссакка Кыайыы чиэһигэр салют ыттылар.