1993 сыл ахсынньы 12 күнүгэр Россия норуота бүттүүн куоластааһынынан историяҕа киирэр суолталаах хардыыны оҥорбута – демократияҕа олоҕурбут саҥа федеративнай правовой судаарыстыбаны тутуу эрэллээх тирэҕинэн буолбут Россия Федерациятын Конституциятын ылыммыта. Норуот бэйэтин баҕатын биллэрэр төрүт докумуона нацияҕа бүттүүнүгэр сөбүлэһиини, сүрүн сыаннаһынан киһи, кини бырааптара уонна көҥүллэрэ буоларын мэктиэлиир социальнай судаарыстыба быһыытынан Россия олоҕун-дьаһаҕын уонна инникигэ сайдыытын сокуонунан хааччыйыыны көрдөрөр.

Россия дьоно-сэргэтэ бу сүүрбэ икки сыл тухары норуоттар тэҥ буолууларын уонна бэйэлэрин быһаарыныыларын бириинсиптэригэр олоҕурбут саҥа гражданскай уопсастыбаны ситиһиилээхтик тутар. Россия Конституцията дойду туруктаах уонна инникигэ туһаайыылаах сайдыытын эрэллээхтик хааччыйар.

Төрүт Сокуон кыаҕа-күүһэ сөҕүмэр, кини ис хоһооно бүтүннүү киһи туһугар анаммыт буолан, бу докумуон балаһыанньаларын уһун сыллар усталарыгар олоххо көдьүүстээхтик киллэрии мэктиэлэнэр. Судаарыстыбаннай былаас уорганнара киһи дьоһуннук олороругар, көҥүллүк сайдарыгар уонна Россия аан дойдутааҕы уопсастыба тэҥ бырааптаах партнерун быһыытынан суверенитетын бөҕөргөтүүгэ бары наадалаах усулуобуйалары үөскэтэллэрэ салҕанар.

Саха Өрөспүүбүлүкэтин олохтоохторо норуоттар бэйэлэрин быһаарынар бырааптарын туһанан, өрөспүүбүлүкэ историятын хаамыытынан олохтоммут судаарыстыбаннаһын чөл хаалларыыга санааларын эппиттэрэ уонна кини Россия Федерациятын тэҥ бырааптаах субъегын быһыытынан инники кэскилин быһаарбыттара. Биһиги айымньылаах үлэбит түмүктэрэ Россия үлэтин уопсай ситиһиилэригэр кыттыһалларынан, кини аптарытыатын уонна модун күүһүн бөҕөргөтөллөрүнэн киэн туттабыт.

Саха Өрөспүүбүлүкэтин Ил Түмэнин үлэтэ барыта Россия Федерациятын Төрүт Сокуонун кэһиллибэт балаһыанньаларыгар олоҕурар уонна гражданскай уопсастыба, киһи демократическай бырааптарын уонна көҥүллэрин, уопсастыбаҕа ил-эйэ уонна туруктаах буолуу политикатын олоххо киллэриини сокуонунан хааччыйыыга туһаайыллар.

Эґиэхэ этэҥҥэ буолууну, чэгиэн доруобуйаны уонна дьолу-соргуну баҕарабыт!

Саха Өрөспүүбүлүкэтин Ил Түмэнэ