Петр I кэмиттэн ыла сайдар Россия наукатын историятыгар албан ааттаах түгэннэр аҕыйаҕа суохтар. Күн бүгүн даҕаны наука тэрилтэлэрэ күүскэ сайда, тупса тураллар. Россия учуонайдарын үлэлэрин уонна ситиһиилэрин үтүө түмүктэрин биһиги күннээҕи олохпутугар уонна үлэбитигэр билэ-көрө сылдьабыт.

Аныгы үйэ ирдэбиллэригэр хоруйдаан, Саха сирин учуонайдара олоххо саҥаттан саҥа технологиялары уонна арыйыылары киллэрэллэр, промышленноска, тыа хаһаайыстыбатыгар, культураҕа, энергияны харыстааһыҥҥа, биотехнологияларга наука эдэр кадрдарын үүннэрэн таһаараллар, республика уонна ону таһынан Уһук Илиҥҥи регион социальнай-экономическай сайдыыларыгар дьоһун кылааттарын киллэрэллэр.

Бүгүҥҥү күҥҥэ Саха сирин научнай-чинчийэр институттарыгар 2 тыһыынчаттан тахса киһи үлэлиир. П.И.Мельников аатынан Ирбэт тоҥу чинчийэр институт, Ю.Г.Шафер аатынан Космическай физика уонна аэрономия институтун, В.П.Ларионов аатынан Хотугу сир физико-техническай проблемаларын институтун, Н.В.Черскэй аатынан Хайа дьыалаларын институтун курдук республика уһулуччулаах научнай тэрилтэлэрин, онтон да атыттар үлэлэрэ аан дойдуга тиийэ биллэр уонна сыаналанар.

Саха сирин парламена науканы сокуон өттүнэн өйөөһүҥҥэ ураты болҕомтотун уурар. Аҥардас ааспыт сылга наука уонна үөрэхтээһин эйгэтигэр алта сокуон ылыллан, үрдүк үөрэх кыһаларын преподавателлэрин үлэлиир усулуобуйаларын тупсарыыга уонна хамнастарыгар быраап төрүттэрин олохтообута, научнай чинчийиилэр уонна экспериментальнай үлэлэр тустарынан дуогабардар көрүҥнэрин кэҥэппитэ, саҥа арыйыылары туһанар тэрилтэлэр кэрискэлэрин оҥоруу бэрээдэгин быһаарбыттара.

Ил Түмэн наука эйгэтин бары үлэһиттэригэр дойдубут, хас биирдиибит чэчирии сайдарын туһугар ураты быһаарыылары, саҥа арыйыылары уонна ситиһиилэри баҕарар!

Саха Республикатын Государственнай Мунньаҕа (Ил Түмэнэ)