- Кэбээйитээҕи Сынньалаҥ киинигэр «Сүрэххэ сөҥмүт ырыалар» диэн улахан кэнсиэркэ 8 вокальнай ансаамбыл, биирдиилээн, бөлөҕүнэн ырыаһыттар - барыта 85 киһи кыттыыны ылла.
- Киһи сөҕөрө-махтайара диэн ыраы киэһэтигэр саҥалыы тэриллэн тахсыбыт вокальнай ансаамбыллар «сүрэхтэниилэрэ» буолла. Кэбээйитээҕи орто оскуолаттан иитии кафедратын учууталларын «Ыллаана»(салайааччы О.И. Обутова), «Дьулуур» ыччат уонна спорт киинин үлэһиттэрин «Иэйии» (Л.С. Семенова) ансаамбыллара, дьиэ кэргэнинэн кыттыыга – Полина, Марианна Даниловалар уонна Виктор Макаров уостан түспэт «Ферма кыргыттара» ырыалара, уруунан-аймаҕынан кыттыыга Степановтар убайдарын СӨ култууратын туйгуна, самодеятельнай композитор, биһиги биир дойдулаахпыт Р. Степанов «Хатыҥнар суугунуу ыллыыллар» ырыалара, оскуола үөрэнээччилэриттэн - 3 «а» кылаас үөрэнээччилэрин «Өркөн» хора саҥа саҕахтары арыйда.
- СӨ култууратын туйгуна М.С. Максимова бу ырыа түһүлгэтин кэнсиэригэр аҥардас 3 вокальнай бөлөҕү бэлэмнээн кытыннарда.
- Саҥа талааннары арыйыыга – эдэр ыччаттартан Николай Яковлев, Григорий Данилов, Дмитрий Сметанин толорбут ырыалара көрөөччү ытыс тыаһынан доҕуһуолланна. Кэрэ эйгэ оскуолатын учууталлара Анна Эверстова, Мария Максимова А.Калининскай мелодиятыгар «Ньургуһун ыһыаҕа» ырыаны киһи сүрэҕин ортотунан киирэр гына толорон көрөөччүлэри «сибэкки ыһыаҕар» ыалдьыттаттылар.
- Кэрэ киэһэ кыттыылаахтарыгар өйдөбүнньүк грамоталар туттарылыннылар. Ырыа күнүгэр нэһилиэкпит талааннаах ырыаһыттара - дууһаны долгутар, сүрэҕи сылаанньытар ырыа киэһэтин бэлэхтээтилэр, умнуллубут ырыа матыыптарын санаттылар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети