Оҕо биһигини, улахан дьон,у күүстээхтэр, хорсуннар, баар моһоллортон кинини куруук көмүскүүллэр диэн муҥура суох эрэнэр. Үүнэн эрэр эдэр көлүөнэни сэрииттэн, хара санааттан, сиэрэ суох быһыыттан көмүскүүр ытык эбээһинэстээхпит.

Бу бэлиэ күн сэрии кэннинээҕи 1949 сыллаахтан ыла бэлиэтэнэр буолбутун санаан ааһар тоҕоостоох. Оччолого аан дойдуга сэрии оҕолорун дьылҕаларын туһунан боппуруос сытыытык турара. Ити уустук кэмнэргэ оҕолор улахан дьону кытта тэҥҥэ үлэлииллэрэ, хорсун быһыыны оҥороллоро.

Оҕо быраабын, интэриэһин көмүскээһини биһиги куруутун инники күөҥҥэ тутабыт. Оҕо сиэр-майгы өттүнэн иитэр, кинини норуоттар култуураларын кытта билиһиннэрэр, оҕону эргиччи сайыннарар соругу тутуһабыт.

Оҕо күүстээх, сиппит-хоппут киһи буола улаатарыгар кини оҕо сааһа дьоллоох буолуохтаах. Былаас уоргана, педагогтар, уопсастыбаннас эрэ буолбакка, бу - хас биирдии ийэ, аҕа ытык иэһэ.

Мин оҕолорум, сиэннэрим олоҕу олорорго, таһаарыылаахтык үлэлииргэ, баар мэһэйдэри аахсыбакка, инники диэки дьулуһарга сүрүн төһүү буолаллар. Олоҕу саҥалыы көрөргө, олох үтүөтүн, үчүгэйин сүһэн ыларга, сырдык инникигэ бигэтик эрэнэргэ кинилэр кынаттыыллар. Бэлиэ күнүнэн барыгытын истиҥник эҕэрдэлиибин! Оҕолорбутун – инники кэскилбитин, харыстааҥ, араҥаччылааҥ!

 Саха Өрөспүүбүлүкэтин баһылыга Егор Борисов.