Мунньахха республика правительствотын бэрэссэдээтэлэ Галина Данчикова, бастакы вице-премьер Генадий Вадюхин, вице-премьер Анатолий Скрыбыкин, республикатааҕы министерстволар уонна ведомстволар салайааччылара, «ЛОРП» хампаанньа бэрэстэбиитэллэрэ кытыннылар.

Сүрүн дакылааты «ЛОРП» ААО генеральнай директора Сергей Ларионов оҥордо. Кини тэрилтэ дьыл кэминэн үлэлиир уратылаах, ол түмүгэр ночоото барыһын иннинэ ааҕыллар диэтэ.

2013 сыл ордук уустук буолла. Кыһыҥҥы кэмҥэ суудуналар турууларыгар уонна өрөмүөннэригэр Өлүөнэтээҕи пароходство сайыҥҥы тыҥааһыннаах навигацияҕа көхтөөхтүк бэлэмнэммитэ, ол хаамыытыгар үгэс буолбут хотугу таһаҕас таһыытыгар «Газпром» ААО сүүһүнэн тыһыынча тонна таһаҕаһын илдьэргэ былааннаммыта. Ол эрээри кэнники түгэҥҥэ «Газпром» Чаяндатааҕы нефтегазоконденсатнай сири баһылыыры кэнникигэ көһөрбүтэ, онон сылтаан күүтүллүбүт таһаҕаһы таһыы үлэлэрэ тохтолуллубуттара.

Ол да буоллар, 550 мөл. солкуобайдаах сүрүн ночооту сайын Өлүөнэ эбэ баһыгар, Уу-Куттан Витим бөһүөлэгэр диэри уу таһыма ураты уһуннук намтаан туруутуттан ылбыта. Уу таһыма 140 см эрэ буолан, оннооҕор намыһах да суудуналар бу учаастакка олох аҕыйах таһаҕастаах айанныырга күһэллибиттэрэ. Бу рейстэри оҥоруу аҕйааһыныгар эрэ буолбакка, таһаҕаһы эбииилдьиигэ, туһанааччыларга тиэрдии бириэмэтэ уһууругар тиэрдибитэ.

Индигир өрүскэ эмиэ улахан кыһалҕалар үөскээбиттэрэ.

Итиннэ саамай сэрэхтээҕинэн Сергей Ларионов, «өрүс-муора» кылаастаах дириҥинэн айанныыр суудуналар суохтарынан, Индигир муораҕа түһэр сиригэр итиннэ сылдьарга анамматах өрүс аалларын сырытыннарарга күһэллибиттэрин бэлиэтээн эттэ.

Тэрилтэ кыһалҕаларын өссө эбии олоҕо суох сонуннары тарҕатыы дириҥэтэн биэрбитэ. Ити сонуннартан куттанан бааннар пароходствоҕа кредиты биэрэртэн аккаастаммыттара.

Мунньах кэмигэр Егор Борисов республика сүрүн таһаҕаһы таһааччыны куруутун өйүүрэ уонна инникитин да өйүүр санаалааҕын биллэрдэ.

Саха сирин баһылыгын онно сыһыаннаах кэнники дьайыытынан кини «ВТБ Банк» ААО Правлениетын бэрэссэдээтэлин Андрей Костинныын көрсүһүүтэ буолар. Ол түмүгэр 2020 сыллаахха диэри «ЛОРП» ААО кытта кредитнэй дуогабары түһэрсиигэ сөбүлэҥ оҥоһулунна.

Егор Афанасьевич ити иннинэ «ЛОРП» акцияларын федеральнай пакетын республика бас билиитигэр биэрэр туһунан РФ Правительствотыгар этии киллэрэр туһунан быһаччы быһаарыныы ылыммыта. Ол быһаарыллар түгэнигэр Саха сирэ пароходство акцияларын 51%-нын ылыаҕа. Бүгүн акциялары биэрии номнуо саҕаланна. Ол бу сыл бүтүөр диэри түмүктэниэҕэ.