"Республика арктическай оройуоннарыгар Өлүөнэ өрүс пароходствотын флота альтернативата суох тырааныспар", – диэн эттэ маныаха сыһыаннаан тырааныспар уонна суол хаһаайыстыбатын миниистирэ Семен Винокуров.

Өлүөнэ өрүс пароходствотын (ЛОРП) акциятын 25,5% республика бас билиитигэр этэ. Эмиэ бачча өлүүнү федеральнай киин ылара. Акция онтон атына чааһынайдарга баар.

"Москва акцияларга бэйэтин ирээтин атыылаары гыммыта. Акция хонтуруоллуур пакета государство бас билиитигэр хааларыгар республика интэриэстээх. Өлүөнэ өрүс пароходствотын флота ураты, атын ханна да суох. Флот өрүһүнэн, муоранан устар суднолардаах. Ити көмөтүнэн хоту сирдэргэ таһаҕас тиэрдиллэр. Биллэн турар, чааһынайдар барыһы эрэ сомсон ылар баҕалаахтар. Оттон государство дьон олоҕун сөптөөхтүк хааччыйыыны инники күөҥҥэ тутар. Онон үөһэ этиллэр пароходствоны хонтуруоллууру оннунан хаалларыы стратегическай өттүнэн улахан суолталаах түгэн буолар. Егор Борисов уонна республика правительствота үс сылтан ордук кэм устата бу туһунан федеральнай киини кытта кэпсэтиһиини, ырытыһыыны ыыппытын түмүгэр Егор Афанасьевич биһиги дойдубут уратытыгар Москваны итэҕэттэ. Онон федеральнай киин ЛОРП акцияларын приватизациялыыртан аккаастанна уонна рсепубликаҕа биэрдэ ", - диэтэ миниистир.