Чокуурдахха 275 миэстэлээх оскуола тутуллуута 2015 сыл сайыныгар саҕаланыахтааҕын туһунан үөрэх миниистирэ  Сардана Татаринова эттэ.

ДьКХ уонна энергиэтикэ миниистирэ Алексей Колодезников Чокуурдах дьиэлэригэр итиини балаҕан ыйын 8 ыла бэриллиэҕин, теплотрассаларга уонна хочуолунайдарга үлэ былаанынан баран иһэрин ыйда.

2015 сылга Русское Устье сэлиэнньэтигэр саҥа хочуолунайы тутуохтара. Ону таһынан улууска олорор дьиэлэри хапытаалынайдык өрөмүннүүллэр. Сотору коммунальнай саҥа тиэхиньикэни аҕалыахтаахтар.

Тырааныспар уонна суол хаһаайыстыбатын миниистирэ  Семен Винокуров эппитинэн, Русскай Устьеҕа снегоболотоходу биэрбиттэр.

Таһаҕаһы тиэйиигэ күргүөмнээх үлэ ыытыллар. Индигииргэ «Ленскэй 2021» өрүстэн сири хостуур тэрил үлэлир. Манна өссө биир земснаряд эбии кэлиэҕэ.

«Ленанефть» судно Чокуурдаахха кэллэ. Судно 2 тыһыынчаттан тахса тонна уматыгы тиэйэн аҕалла. Зеленай мыс пуордуттан чохтоох суднолар, ону таһынан предпринимателлэр контейнердарын тиэйбит судно кэлиэхэрэ.

Русской Устьеҕа 2015 сылга фельдшердээх-акушердаах пуун тутуллуоҕа.

Чокуурдаахха эдэр специалистарга, дьиэлэрэ умайбыт дьоҥҥо, нэһилиэнньэ кыаммат араҥатыгар анаммыт 38-квартиралаах олорор дьиэ тутуллар. Чокуурдаахха уонна Оленегорскайга 4 квартиралаах дьиэлэри тутууну былаанныыллар.

Егор Борисов нэһилиэнньэни кытта көрсүһүүтэ «Ыйыт-хоруйдуубут» көрүҥүнэн барда. Роспотребнадзор быһаарыытынан Арктикаҕа баар филиаллар сабыллыбыттара үгүстэри долгутарын эттилэр. Егор Борисов манна быһаччы орооһоругар көрдөстүлэр. Олохтоох аэропуорт гидрометосулууспатыгар ыстааты сарбыйыыны кытта сөпсөспөттөрүн эттилэр.

Табаны иитии, бэйдиэ сылдьар ыттары суох оҥоруу, ититии кэмин, оҕо площадкаларын тутуу, о.д.а. долгутар үгүс ыйытыктарын олохтоохтор сытыытык туруордулар.

Егор Борисов Арктика олоҕо-дьаһаҕа киин улуустартан итэҕэһэ суох буолуохтааҕын, онон Аллайыаха дьонун-сэргэтин олоҕун тупсарыыга кыаллары барытын оҥоруох буолан эрэннэрдэ.