Егор Борисов бу тула дьон-сэргэ ортотугар араас санаа үөскээбитин кэтээн көрөрүн эттэ: «Маныаха санаа хайдыһыыта, араастаһыыта баар. Сорохтор миграннар кэлэн сири ылыыларын түмүгэр биһиэхэ сир тиксиэ суоҕа диэн долгуйаллар. Атыттар быраҕыллан турбут тыа хаһаайыстыбатын сирдэрэ туһаҕа таһаарыллыахтарын ыйаллар».

Уһук Илиҥҥи регионтан дьон күрүгүөмүнэн көһөн барыытын бохсор уонна тыа хаһаайыстыбатыгар анаммыт сирдэри туһаҕа таһаарар туһуттан РФ президенин боломуочуйалаах бэрэстэбиитэлэ итинник көҕүлээһини оҥорбутун Егор Борисов бэлиэтээтэ. «Биһиги бырайыактары олоххо киллэриэхтээхпит, оҥорон таһаарыыны улаатыннарыахтаахпыт, дьон олороругар табыгастаах усулуобуйаны оҥоруохтаахпыт. Уһук Илиҥҥи региоҥҥа уонна өрөспүүбүлүкэҕэ усулуобуйа уратылаах. Бастатан туран, биһиэхэ дьон көһүүтэ, нэһилиэнньэ аччааһына суох. Төттөрүтүн төрөөһүн, эбиллии баар. Иккиһинэн, Уһук Илиҥҥи регион субьектарыгар тыа хаһаайыстыбатын сирэ элбэх, итилэр туһаныллыбакка тураллар. Холобур, Амур уобалаһын сирэ-уота өрөспүүбүлүкэ гиэниттэн  хас эмэ бүк кыра. Ол эрээри тыа хаһаайыстыбатыгар анаммыт сирэ элбэх», - диэтэ Егор Борисов.

Суоллаах-иистээх, табыгастаах, инфрастурктуралаах сири арендаҕа биэрии сөбө суоҕун Е.Борисов ыйда: «Саха сиригэр маннык сирдэргэ хаарчахтааһын баар. Манна көһөн кэлэр дьон мэһэйэ суох бу сирдэри ылыахтара уонна туһаныахтара диир уустук. Биһиги маны иҥэн-тоҥон ырытыахпыт, сүбэлэһиэхпит уонна РФ президенин бастайааннай бэрэстэбиитэлигэр этиилэрбитин киллэриэхпит. Саха сиригэр бу – судургута суох боппуруос», - диэтэ Егор Борисов.