«Мин Саха сирин бары чунуобунньуктарыгар коррупцияны утары охсуһууну бэйэттэн саҕалыахха наада диэн этэбин. Манна бэрээдэги тутар буоллаххына, үлэһиттэрин эмиэ туһааннаах нуорманы тутуһарга кыһаллаллар», - диэтэ Егор Борисов.

Республика Аҕа баһылыга коррупцияны утары охсуһууга үс сүрүн быһаарыыны ылбытын бэлиэтээтэ. «Бастакытынан, мин хас биирдии салайааччы эппиэтинэһин үрдэтэбин. Маны тутуспатах элбэх министр, чунуобунньук дьарыйылынна. Кэлиҥҥи кэмҥэ элбэх чахчы баара. Иккиһинэн, министерстволар, биэдэмистибэлэр государственнай сакааһынан дьарыктаналларын республика таһымыгар суох оҥордум, бу үлэни бүтүннүүтүн Госкомзаказка сүктэрдим. Биир структураны хонтуруоллуур кэбэҕэс», - диэн бэлиэтээтэ Егор Борисов.

Үсүһүнэн, государство уорганнарын өҥөлөрүгэр наадыйар дьон чунуобунньуктары кытта алтыһыыларын аҕыйатыахха наада. «Биһиги «биир түннүк» тиһигин олохтоотубут, чопчу ыйыллыбыт регламент чэрчитинэн үлэлиир элбэх өҥөнү оҥорор киини тэрийдибит», - диэн регион баһылыга быһааран биэрдэ.

Кини эппитинэн, республика правительствотыгар чугастааҕы кэмҥэ гос-сулууспалаахтар бэрээдэктэрин кэтиир туспа уорган тэриллиэ суоҕа. «Биһиги общество хонтуруолун олохтуубут. Дьон сүрүн быһаарыылары ылыныыга кыттыыны ылыахтарын наада. Биһиэхэ былаас уорганнара аһаҕас буолууларыгар үчүгэй уопут баар. Бу — государственнай, муниципальнай уорганнар нэһилиэнньэ иннигэр отчуоттара. Сыллата Саха сирин правительствотын чилиэннэрэ регион хас биирдии нэһилиэнньэлээх пуунугар тиийэн үлэлэрин отчуоттууллар. Мин нэһилиэнньэни кытта көрсүһүүбэр тоҕо онно суол оҥоһуллубата, тоҕо ол кырааскаламмата диэн ыйытыы киирбэт. Ол олохтох былаас боломуочуйата буоларын билэллэр».