Мунньахха «Энергетические системы Востока» РАО генеральнай дириэктэрэ Сергей Толстогузов өрөспүүбүлүкэ бырабыыталыстыбатын бэрэссэдээтэлэ Галина Данчикова, «ЭС Востока» РАО салайааччылара, «Якутскэнерго» АК генеральнай дириэктэрэ Олег Тарасов, Дьокуускай куорат баһылыга Айсен Николаев, уо.д.а. кытыннылар.

«Энергетические системы Востока» РАО инвестицияҕа уонна стратегияҕа генеральнай дириэктэри солбуйааччы Алексей Каплун мунньахха сүрүн иһитиннэриини оҥордо. Бу иһитиннэриитигэр кини Саха сирин энергиэтикэтин туругун тургутан көрдө, кыһалҕалар уонна онтон тахсар дьаһаллар тустарынан ырытта.

Мунньахха биир үксүн Дьокуускайга ГРЭС-2 бастакы уочаратын тутууну түмүктүүрү ырыттылар. Саҥа электростанция кыамтата – 193,48 МВт, итиинэн хааччыйар кыаҕа – 460 Гкал/ч., сылга электроэнегрияны оҥорон таһаарыыта – 1 440,407 мөл. кВтч тэҥнэһэр.

ЯГРЭС-2 бастакы уочаратын бырайыагар инженернэй инфраструктура эбийиэктэрэ киирэллэр. Уунан, гааһынан хааччыйыы, тутуу сиригэр киирэргэ суолу оҥоруу, о.д.а. эбийиэктэр «ЭС Востока» РАО 2014 уонна 2015-2017 сылларга иневестиционнай бырагырааматын чэрчитинэн үбүлэнэллэр. 2014-2016 сылларга үбүлээһин кээмэйэ 5 831,8 мөл.солк.

Компания бэрэстэбиитэллэрэ ЯГРЭС-2 бастакы уочаратын тэҥэ 145 МВт кыамталаах иккис уочараты тэҥҥэ тутуу саҕаланыахтааҕын туһунан этэллэр. Оччотугар ЯГРЭС-2 бигэргэммит кыаҕа 338 МВт тэҥнэһиэх этэ. Бу олоххо киирдэҕинэ, эргэ ГРЭС үлэтин олорчу тохтуоҕа. ГРЭС-2 иккис уочараты тутуу хантан үбүлэнэрэ билиҥҥитэ быһаарылла илик.

Алексей Каплун ЯГРЭС-2 сиригэр-уотугар ууну сылытар хочуолунай тутулларыгар этии киллэрдэ. Маннык тутууга 1 664 мөл. солк. ороскуоттаныаҕа. Ити үбү-харчыны «ЭС Востока» РАО уйунар.

Саҥа эбийиэктэри үлэҕэ киллэрии Дьокуускай куорат ититэр тиһигин төрдүттэн уларытар, саҥардар. Көдьүүһэ суохтук үлэлиир хочуолунайдар ноҕоруускаларын саҥа станцияҕа холбуохтара. Бу соругу ситиһиилээхтик олоххо киллэрэр туһугар «РусГидро» уонна өрөспүүбүлүкэ, куорат дьаһалталарын кытыннаран туспа тэрилтэни үөскэтэр туһунан этии киирдэ.

Саха сирэ ГРЭС-2 бастакы уочаратын тутууга «РусГидро» устааптаах хапытаалыгар 1 млрд. солк. киллэрэр. Алексей Каплун үбү-харчыны барыстаахтык угуу буолуоҕун бэлиэтээн эттэ.

Аллараа Халыма Чиэрскэйин энегиянан хааччыйыы былаанын тула сытыы кэпсэтии буолла. 2018 сылга Билибинскэйдээҕи АЭС үлэтин тохтотуу Черскэйгэ эрэ буолбакка, бүтүн Чукоткаҕа элбэх кыһалҕаны, мэһэйи үөскэтиэн сөбүн ыйдылар. Сергей Толстогузов Черскэйгэ 100 МВт кыамталаах саҥа электостанцияны тутуу улахан көдьүүстээх буолуоҕун чиҥэтэн эттэ.

Нерюнгритааҕы ГРЭС төрдүс блогун тутууну, Алдан оройуонун ДьКХ туругун, Тиксии-3 бөһүөлэги энергиянан хааччыйыыны, о.д.а. ырыттылар. Мииринэй-Сунтаар-Ньурба үһүс уонна төрдүс комплекстарын тутууну дьүүллэстилэр. Манна 2018 сылга диэри 5,1 млрд.солк. бэриллиэхтээх, ол эрээри ити үп-харчы хантан ылыллара билиҥҥитэ эмиэ быһаарылла илик.

Ити курдук, Саха сирин электоэнегриянан хааччыйыыны улуустары барытын эргиччи хабан ырыттылар.

Мунньах бүтүүтэ Саха сирин баһылыга Егор Борисов уонна «Энергетические системы Востока» РАО генеральнай дириэктэрэ Сергей Толстогузов бииргэ үлэлиир сөбүлэһиигэ илии баттаатылар. Сөбүлэһиигэ өрөспүүбүлүкэ энергиятын сайыннарыы, 2015-2025 с.с. энергиянан хааччыйыы боппуруостара киирдилэр.