«2014 сыл Саха сиригэр Арктика сылынан биллэриллибитэ. Онно туох оҥоһуллубутун, туох кыаллыбатаҕын туһунан элбэҕи этиэххэ сөп. Оттон сүрүнэ диэн биһиги Хоту сирбитигэр сирэйбитинэн буоллубут. 90-с сылларга реформатордар рынок усулуобуйатыгар Хоту сиргэ олорор олус ороскуоттаах диэн быһаарбыттара, онон онно баар бөһүөлэктэртэн дьону көһөрүү саҕаламмыта. Ол эрээри бириэмэ көрдөрбүтүнэн, ол алҕаһааһын этэ» - диэтэ Егор Борисов.

Кини эппитинэн, билигин Россия Арктикатын хаттаан сөргүтүү саҕаланна: «Хайдахтаах да быһыыга-майгыга Хоту сиртэн арахсыан баҕарбат дьон баар. Кинилэр онно инникигэ эрэллээх олоруохтарын баҕараллар. Быйыл Арктика уонна хоту улуустарга биллэр көмөнү оҥордубут. Онно 2,5 млрд солкуобай көрүлүннэ, ол иһигэр олорор усулуобуйаны тупсарыыга 500-тэн тахса мөлүйүөн. Элбэх социальнай тутуу барар. Бу саҕалааһын эрэ. Мантан инньэ өссө элбэх үлэ күүтэр».

Салгыы Егор Борисов 2014 сыл Российскай Федерацияҕа Кульура сылынан бэлиэтэммтинэн, культура тэрилтэлэригэр дьон сылдьыыта элбээбитин, кинематографистарбыт ситиһиилэринэн үөрдэллэрин, гастролларга сылдьыы үксээбитин, республика Культура туһунан сокуона олоххо киирэрин эттэ. Бүгүн культура, искусство эйгэтигэр оҥоһуллар өҥө хаачыстыбатыгар болҕомто туһаайыллыахтааҕын ыйда.

«Быйыл саас Россия президенэ Владимир Владимирович Путин 2022 сылга Саха автономиятын 100 сылын бэлиэтиир туһунан быһаарыыта ылыныллыбыта. Россияҕа Культура сылын уонна Саха АССР 100 сылыгар бэлэмнэнии чэрчилэринэн оҥоһуллубут этиилэр 2030 сылга диэри республика культуратын политикатын концепциятыгар киллэриллиэхтээхтэр уонна норуот бүттүүнүн дьүүллэһиитигэр тахсыахтаахтар», - диэн бэлиэтээтэ Саха сирин Аҕа баһылыга.

Кини үүнэр сыл Российскай Федерацияҕа Литература сылынан биллэриллибитигэр болҕомтону туһаайда. «Бу биһиэхэ республикаҕа тыл политикатыгар саҕаламмыт үлэни күүһүрдэрбитигэр эбии төһүүнэн буолар. Сайын Саха сирин суруйааччыларын кытта көрсүһүү буолбута, онно баар кыһалҕалары дьүүллэспиппит, биһиги литератордарбыт, бастатан туран эдэр ааптардар айымньылаахтык үлэлииллэригэр усулуобуйаны тэрийии туһунан сүбэлэспиппит», - диэтэ Егор Борисов.