Дьон ыйытыга биир үксүн дьиэ-уот, коммунальнай хаһаайыстыба, дьиэлэри ситэри хааччыйыы, социальнай эбийиэктэр туруктарын туһунан буолла.
Нерюнгри кырдьаҕастарын пенсияларыгар оройуон коэффиценын үрдэтии боппуруоһун Егор Борисов бэйэтэ сытыытык туруорда. Маныаха суутунан быһаарсыы баҕарбыт, санаабыт түмүгү аҕалбатаҕын билиннэ. Егор Афанасьевич хоту сир аҕа саастаах көлүөнэтин пенсиятын улаатыннарарга атын суолу толкуйдуур, тобулар ордугун эттэ.
Республика баһылыгын э.т. Москва, Хабаровскай куораттарга ыытыллар үрдүк таһымнаах мунньахтарга федеральнай кииҥҥэ Уһук Илини сайыннарыыга анаммыт миэрэлэр ситэтэ суохтарын чиҥэтэн бэлиэтиирин кэпсээтэ. Уһук Илин макрорегионугар бөдөҥ бизнескэ эрэ араас чэпчэтиилэри олохтуур сөбө суоҕун, макрорегион нэһилиэнньэ бары араҥатын, ол иһигэр бюджет эйгэтин үлэһиттэрин, тыа сирин олохтоохторун бэйэтигэр тардыахтаах диэн санаанан салайтарарын куруук этэр.
Сэбиэскэй кэм саҕанааҕы үтүө, сөптөөх дьаһал сороҕун сүһэн ылар, төннөрөр наадалааҕын кини бэлиэтиир. Хоту сир пенсионера Россия киин өттүгэр олорор пенсионеры кытта тэҥ дохуоттанара сөбө суоҕун кини ыйар. Пенсия кээмэйин ааҕарга хоту сир улахан ороскуота аахсыллыахтаах. Манна ороскуот хас эмэ бүк үрдүк.
Егор Борисов сэрии сылларынааҕы оҕолорго чэпчэтиини олохтуур туһунан туруорсууга санаатын үллэһиннэ. Саха сирин олохтооҕун бүгүҥҥү ахсаана 957 тыһ. киһи. Итинтэн аҥаара сокуоннай саастарын ситэ илик оҕо. 300 тыһ. киһи араас льготанан туһанар. Элбэх оҕолоох ыалга, инбэлииттэргэ, тулаайахтарга, о.д.а. чэпчэтии дьайар. Нэһилиэнньэ хайа эрэ чопчу категорията буолбакка, сыалай көлүөнэ чэпчэтиинэн туһанара диэн урут хаһан да суоҕа. Аныгы ырыынак кэмигэр льгота дьайар кыаҕа араастаһар. Холобур, ситиһиилээхтик үлэлиир предпринимательгэ 1 тыһ. солк. кэпиэйкэҕэ тэҥ. Оттон пенсионерга эбэтэр соҕотох ийэҕэ - кырата суох көмө.
Онон, Егор Борисов хас биирдии киһиэхэ кини балаһыанньатыттан көрөн, чопчу, персонофицированнай сыһыан үөскэтиллэрэ сөбүн эттэ. Чэпчэтии наадыйааччыга эрэ оҥоһуллуохтаах диэн кини бигэ санаалаах.
Комментарии
Авторизация на сайте через социальные сети