Саха сирин баһылыгын э.т. Егор Борисов оҕону өйүүргэ, кини сайдарыгар уонна оҕону көмүскүүргэ републикаҕа элбэх үлэ ыытылларын, үчүгэй усулуобуйа тэриллэрин ойуччу тутан бэлиэтээтэ. «Хас биирди дьэндэйэн тахсар тутуу хайа эрэ өттүнэн оҕону кытта ыкса ситимнээх. Стадион да, спорт саалата да буоллун. Лицей аһыллан өрө тахсыылаахтык үлэлииригэр аартыгы аспыт киһинэн Михаил Николаев буолар. Сонун сүүрээни, саҥа саҕалааһыны көҕүлүүр, иилиир-саҕалыыр маннык дьон бааллара олус үчүгэй. Биһиги тутааччыларбыт дьиэни-уоту үчүгэй көстүүлээх эрэ гына буолбакка, үрдүк хаачыстыбалаахтык туталларыттан үөрэбин», - диэтэ кини.
Его Борисов лицейгэ интерактивнай оборудованиены бэлэхтээтэ.
Лицей дириэктэрэ Альберт Реев эппитинэн, лицейгэ республика 22 улууһуттан барыта 224 оҕо үөрэнэр. «Оҕолору 8 кылаас кэнниттэн политихническай хайысханан үөрэтэбит. М.А.Бонч-Бруевич аатынан Санкт-Петербургтааҕы государственнай университеты, Бауман аатынан Москватааҕы техническэй университеты кытта ыкса ситимнээхтик үлэлиибит. Сайын биһиги оҕолорбут ити үөрэх кыһаларыгар эбии дьарыктарга сылдьаллар. Оттон үөһэ этиллэр үөрэх тэрилтэлэрин уһуйааччылара манна кэлэллэр», – диэн кини экскурсия кэмигэр кэпсээтэ. Лицейгэ тренажернай саала, компьютернай кылаас, медблок, о.да. баарын биһирии билистибит.
5 оҕо кыһыл көмүс мэтээллээх, киин үөрэх кыһаларын олимпиадаларыгар ситиһиилээхтик кыттыбыт уонна үөрэххэ ыларга этиллибит 6 оҕо быйыл Өктөмнөөҕү лицейы бүтэрэр.
Үөрүүлээх тэрээһиҥҥэ кыттыбыт республика бастакы президенэ Михаил Николаев сэбиэскэй кэм саҕанааҕыттан аныгы интернат суолтата таһыччы атынын бэлиэтээн эттэ. «Урукку өттүгэр ыарахан кэмҥэ, аччык сылларга доруобуйатын кэбирэппэтин туһугар оҕону интернакка биэрэллэр этэ, оттон билигин муҥутуур сайдыылаах буолууга интернат олугу уурар», - диэтэ кини.
Комментарии
Авторизация на сайте через социальные сети