Дмитрий Глушко ити туһунан сүрүн өрүттэрин иһитиннэрдэ. Кини эппитинэн, оонньуу ыытыллар кэмэ бэс ыйын 7-13 күннэрэ диэн быһаарыллыбыт: бу күн — күрэхтэһии кыттыылаахтара кэлэллэр, от ыйын 8 күнүгэр – күрэхтэһии үөрүүлээхтик аһыллар, от ыйын 13 күнүгэр оонньуу түмүктэнэр.
Тэрээһиҥҥэ барыта 6627 киһи, ол иһигэр 2250 спортсмен кыттар. Бүгүҥҥү туругунан спорт 12 көрүҥэр сүүмэрдиир күрэхтэһиилэр ыытыллыбыттар. 3 көрүҥҥэ спортсменнары талар күрэхтэһии от ыйын саҥатыгар күүтүллэр.
Егор Борисов оонньуу сороҕо буолар Хамаҕаттаҕа спорт комплексын тутуу бытаарбытын бэлиэтээтэ: «Үлэ тэтимин суһаллык түргэтэтиэххэ наада. Билигин тутууга 40 киһи үлэлиир, ол ситэтэ суох».
Элбэх дьон аһылыгын тэрийиигэ, ордук иһитинэн-хомуоһунан, технологическай тэрилинэн хааччыйыыга кыһалҕа үөскээбит. Былаан быһыытынан оскуолаларга, оҕо садтарыгар күрэхтэһии дьонун аһатыахтаахтар. Ити тэрилтэлэргэ оборудование тиийбэт. Бу хайысхаҕа үп-харчы кырыымчыга 6,3 мөл.солк. быһыллар. Үөрэх министиэристибэтин бэрэстэбиитэлэ маныаха тустаах хоруйу кыайан биэрбэтэ, ол эрээри кыһалҕа субу сотору быһаарыллыаҕа диэн эрэннэрдэ.
Бүгүҥҥү туругунан 3 тыһ. миэстэлээх стадион эрэ бэлэм. Тутуу комплексын уонна архитектура миниистирэ Сергей Дереповскай күрэхтэһии аһыллыытын сиэрин-туомун бэлэм эбийиэккэ эрдэттэн бэлэмниэххэ сөбүн эттэ.
Норуоттар спортивнай оонньууларыгар 35 мөл. солк. Дьокуускай-Нам уонна сэлиэнньэ иһинээҕи суоллары өрөмүөннүүргэ ороскуоттаммыт.
Егор Борисов мунньах түмүктэниитэ Намҥа эрэ буолбакка, уопсайынан эбийиэктэр толору хааччыллыылаах оҥорорго болҕомто ууруллуохтааҕын, онно олохтоох нэһилиэнньэни кыттыһыннарар туһунан чиҥэтэн эттэ. Тутуу хаачыстыбата эмиэ ураты улахан болҕомтоҕо ылыллыахтааҕын ыйда: «Тутууну олус кыраһыабайдык уонна үөрүүлээхтик туттарыы кэнниттэн эбийиэк кырыыһатыттан акылаатыгар диэри тохтуута, алдьаныыта-кээһэниитэ саҕаланар. Оннук халы-мааргы үлэ төрдүттэн түөрүллэн суох буолуохтаах!», - диэтэ кини.
Комментарии
Авторизация на сайте через социальные сети