РФ Федерация Сэбиэтин чилиэнэ Александр Акимов, Саха сирин вице-премьердэрэ Феодосия Габышева уонна Александр Борисов, Государственнай Мунньах (Ил Түмэн) депутаттара, Сунтаар улууһун баһылыга Владимир Тихонов, нэһилиэктэр баһылыктара, улууска баар бөдөҥ тэрилтэлэр салайааччылара манна кытыннылар.
Мустубут дьон туох-ханнык иннинэ оройуон коммунальнай инфраструктуратын кыһалҕаларыгар улахан болҕомтону ууруох буолбуттара эрээри, Егор Борисов ырытыһыы ис хоһоонун биллэ кэҥэтэр туһунан этии киллэрдэ.
СР ДьУоКХ уонна энергиэтикэ миниистирин бастакы солбуйааччы Гаврил Левин эппитинэн, кэлиҥҥи үс сылга Сунтаарга саҥа 13 хочуолунай тутуллубут. 6 саҥардыллыбыт. Улуус араас нэһилиэктэригэр 2777 олорор дьиэ уотунан ититиигэ холбоммут. Бу сылга итиниэхэ эбии өссө 244 дьиэ холбонорун былаанныыллар.
Үөрэх миниистирэ Сардана Татаринова Сунтаар үөрэҕириитин систиэмэтин үрдүктүк сыаналаата. Олохтоох оскуолаларга үөрэтии хаачыстыбата өрө тахса турарын бэлиэтээтэ. Сардана Татаринова Элгээйи орто оскуолатын саҥа дьиэтин үлэҕэ киллэрии бэлиэ түгэнинэн буолуоҕун эттэ. «Үтүө дьыала» хамсааһынынан улууска өссө биир оскуола уонна оҕо садын дьиэтэ аһыллыахтаах. 2015-2016 сс. Сунтаар сэлиэнньэтигэр 240 миэстэлээх оҕо сада тутуллуохтаах.
Тыа хаһаайыстыбатын уонна ас-үөл политикатын миниистирэ Иван Слепцов, предпринимательство, туризм сайдыыларын миниистирэ Екатерина Кормилицына, Сунтаар улууһун баһылыга Владимир Тихонов, о.д.а. тыл эттилэр.
Улууска элбэх олорор дьиэ тутуллар. Былырыын 10 тыһ. тахса кв. м иэннээх дьиэ үлэҕэ киирбит. Быйыл бизнес-инкубаторы тутуу түмүктэниэхтээх, элбэх функциялаах киин тутулла турар.
Олохтоох суолу тупсарыыга 2014 сылга суол фондатыттан уопсайа 37 мөл. солк. бэриллибит. «Бүлүү» федеральнай суолга 180 мөл. солк. суумалаах үлэ бүтэн эрэр.
«Якутскэнерго» компания уот ситимин хаһаайыстыбатын саҥардыыга уонна кэҥэтиигэ улахан үлэни ыытар. 2013 сылга улуус 17 нэһилиэнньэлээх пууна суотабай сибээһинэн хабыллыбыт. 2016 сылга Сунтаарга оптоволоконнай сибээс киириэхтээх.
Министиэристибэлэр уонна биэдэмистибэлэр салайааччылара иһитиннэрии кэнниттэн улуус нэһилиэктэрин баһылыктарын, мунньах кыттыылаахтарын ыйытыктарыгар хоруйдаатылар. Дьон уунан хааччыйыы, биэрэги чиҥэтэр үлэ, социальнай суолталаах саҥа эбийиэктэри тутуу, хапытаалынай өрөмүөн туһунан ыйытыктары сытыытык туруордулар.
Мунньах бүтүүтэ Егор Борисов улууска уот ситимин кэҥэтиигэ наадыйыы улаханын бэлиэтээтэ. Онон сибээстээн республика правительствота электроэнергия иһин тарыып инвестиционнай өттүн ырытарга Сунтаар улууһун наадыйыытын туспа көрөргө сорудахтаата.
ДьУоКХ уонна энергиэтикэ министиэристибэтэ Сунтаары уунан хааччыйыыга уонна ууну таһаарыыга кэлимсэ үлэ барыахтааҕын Егор Афанасьевич ыйда. Кэмпэндээйигэ бороҥ чох үөскээбит сирин киэҥник туһаныыны үөрэтэргэ эттэ.
Биэрэги бөҕөргөтөр үлэҕэ правительство тустаах хамыыһыйаны ыытыаҕа. Мунньахха этиллибит санааны, туруорсууну барытын болҕомтоҕо ыларга эттэ Е.Борисов.
Түмүккэ кини маннык диэтэ: "Сунтаарга республика атын улуустарыгар курдук, кэлиҥҥи сылларга элбэх уонна улахан үлэ ыытыллар. Аҥаардас ДьУоКХ министиэристибэтэ биэс сыл иһигэр саҥа 260 хочуолунайы тутта. 90-с сылларга маннык биир да тутуу суоҕа. Ол эрээри сороҕор биһиги эбийиэк тута оҥуһулла охсуон баҕарабыт. Республика кыһалҕаларын быһаарыыга чопчу сыаллаахтык бырагыраамаламмыт бюджет ылыллар. Ханнык баҕарар эбийиэги тутары ити бырагыраамаҕа киллэрии ситиһиллиэхтээх. Кириэстээх оскуолата 2016 сылга тутулларын туһунан ити бырагыраамаҕа киирбит буоллаҕына, тутуу эрдэ саҕаланар кыаҕа суох".
Комментарии
Авторизация на сайте через социальные сети