Дьон Кэмпэндээйи эмтээх бадараанын, цеолит үөскээбит сирин көдьүүстээхтик туһаныыны, промышленность эбийиэктэригэр, ол иһигэр «Сила Сибири» газ магистральнай турбатын тутарга олохтоох ыччат хабылларын ситиһэри дьон турууласта.
Егор Борисовка быыбарга утарсааччылар тустарынан эмиэ таарыйдылар. Егор Борисов сорох көрдөрөр-иһитиннэрэр тиһиктэргэ кини үлэтин күүскэ сэмэлиир ис хоһоонноох матырыйааллар тахсалларын, ол эрээри ааптардар кыһалҕаны туоратыыга чопчу, чуолкай уонна ыллыктаах быһаарыыны тобулбаттарын, эппэттэрин, кэлтэйдии кириитикэлииллэрин эрэ бэлиэтээтэ.
Маныаха сыһыары тутан Егор Афанасьевич 2011 сыллаахха «АЛРОСА» АК тула тахсыбыт быһыыны-майгыны санатта. Оччолорго РФ правительствота алмаас бөдөҥ компаниятын 100 бырыһыан приватизациялыыр соругу туруорбутун, республика салалтатыгар олус уустук кэм кэлэн ааспытын кини өйдөөн-санаан ааста. «Судургута суох быһыы-майгы тыҥаабытыгар кыһыл тылларынан кыырар утарсааччылартан ким да көмөҕө кэлбэтэҕэ. Сэмэлиир ис хоһоонноох ыстатыйалар кэтэхтэригэр куһаҕантан үөрүү, сэтэрээһин кирийбитэ. Элбэхтэ уонна дириҥник толкуйдаммыт быһаарыы түмүгэр 2012 сыллаахха РФ правительствота ити эрдэ ылыммыт соругун көтүрбүтэ. Бүтэһигэр «АЛРОСА» государство бас билиитигэр хаалбыта. Сүдү ситиһиигэ ис сүрэҕиттэн үөрбүт утарсааччы да аҕыйаҕа», - диэтэ Егор Борисов.
«Өлүөнэ өрүһү туоруур муостаны тутууга бүгүн уустук быһыы-майгы үөскээтэ. Сэмэлээһининэн, саралааһынынан эрэ муҥурданааччылар дойдуларын таптыыр, төрөөбүт сирдэригэр бэриниилээх курдук бэйэлэрин арбаналлар эрээри, республика салалтатыгар көмө-ньыма буоларга тиэтэйбэттэр», - диэн эбэн эттэ.
Сунтаардары кытта көрсүһүү олус истиҥ буолла. Егор Борисовка дьон элбэх иһирэх тылы эттэ, кини чэпчэкитэ суох үлэтигэр ситиһиилэри баҕардылар.
Комментарии
Авторизация на сайте через социальные сети