Кини 2012 сыл алтынньытыттан ыла Булуҥ нэһилиэнньэтэ сыл аҥаарыттан ордук кэм устата Дьокуускайга уонна Москваҕа диэри салгынынан тырааныспара суох олорбутун санатта. Салгын тырааныспарын таһынан манна атын сырыы суоҕа. СР правительствотын быһаарыытынан Ми-8 вертолетунан Уус-Куйгааҕа диэри тиксиһиннэрэр рейси оҥоруу туһунан быһаарыыны ылыммыта. Ити дьаһал баар кыһалҕа сороҕун эрэ быһаарбыта. Пассажирдары уонна наадалаах таһаҕаһы тиэйэргэ республика бюджетыттан үп-харчы эбии ороскуоттаммыта.
Былырыын ыам ыйыттан ыла быһыы-майгы бигэтийбитэ. Тиксии аэропордугар билигин Москваҕа уонна Дьокуускайга Ан-24, Ан-26, Boeing-737-700, Sukhoi Superjet-100 самолеттар быысталы билбэккэ көтөллөр. Аэродрому үлэлэтэргэ өссө да кыһалҕа баар. Ол туһунан Сергей Шойгуну кытта Егор Борисов сиһилии кэпсэттэ.
Ол курдук, «Тиксии аэропорда» уонна РФ оборонаҕа министиэристибэ структуралара инникитин сөбүлэһии түһэрсэллэрин ырыттылар. Онно аэродрому тутан олорууга уонна салгын судноларын үлэлэтиигэ, көрүүгэ быраап уонна эбээһинэс чопчутук уонна чуолкайдык ыйылларын туһунан кэпсэттилэр. Байыаннай чааһы ыһыы түмүгэр урукку өттүгэр баар маныаха майгынныыр сөбүлэһии 2012 сыллаахха тохтотуллубута. Билигин бу курдук докумуон суоҕа федеральнай бюджеттан субсидия ыларга харгыһы үөскэтэр.
Тиксии аэродромугар гражданскай авиация суднолара түһэллэригэр, көтөллөрүгэр анаан федеральнай авиация ирдэбилигэр сөп түбэһэр гына саҥардан оҥоруу - сүрүн боппуруос. Саха сирин баһылыгын э.т. Егор Борисов уонна оборона миниистирэ Сергей Шойгу аэродрому саҥардыы үлэтин туһунан сүбэлэстилэр, сөбүлэстилэр.
Комментарии
Авторизация на сайте через социальные сети