ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Фотоматериалы

альбомы
(Не отображено 341 фото) Просмотреть все

На карте

15 мая 2014, 13:35

Дьокуускайга Перинатальнай киин тутуута бигэргэннэ


Россияҕа Перинатальнай кииннэрдээх субъектарга саҥа төрөөбүт оҕо уонна төрүүр ийэ өлүүлэрэ биллэ аҕыйаабыта бэлиэтэнэр. 2012 сылга, иннинээҕи сылы кытары тэҥнээтэххэ, оҕо өлүүтэ 6,9 бырыһыанынан намтаата. Онуоха регионнарга Оҕо төрөтөр дьиэлэртэн ураты элбэх функциялаах көмөнү оҥорор Перинатальнай кииннэр үлэлэрэ улахан оруолу ылар. Билигин Россияҕа 98 Перинатальнай киин үлэлиир.

Ааспыт сыл бүтэһигэр Российскай Федерацияҕа 2014-2016 сылларга Перинатальнай кииннэри тутуу уонна сайыннарыы тосхоло ылыллыбыта. Тосхол быһыытынан, 30 региоҥҥа (ол иһигэр, Саха сиригэр) 32 киин тутуллуохтаах. РФ Президенэ Владимир Путин сорудаҕынан тутуллуохтаах Перинатальнай кииннэр дойдуга демография көрдөрүүлэрин тупсарар, төрүүр ийэлэргэ уонна кырачааннарга сөптөөх усулуобуйаны тэрийэр уонна медицинскэй көмөнү хаачыстыбалаахтык оҥорор, оҕо уонна төрүүр ийэ өлүүтүн аҕыйатар соруктаахтар.

Саха Республикатын Президенэ Егор Борисов соторутааҕыта РФ Правительствотын председателэ Дмитрий Медведев Перинатальнай кииннэри сайыннарыы тосхолун олоххо киллэрии боппуруостарыгар регионнар салайааччыларын селекторнай мунньахтарыгар кыттыбыта.

РФ Правительствота бигэргэппит Тосхолунан 2014-2016 сылларга Саха сирин киин куоратыгар Перинатальнай киин тутуутун олоххо киллэрии көрүллэр. Объегы тутуу Булгуччулаах медицинскэй страховкалааһын федеральнай фондатыттан уонна республика бюджетыттан үбүлэнэрэ быһаарыллыбыта. Ол инниттэн Саха Республикатын 14 сыллааҕы бюджетыгар туһааннаах көннөрүүлэр киллэрилиннилэр.

Онон Киин куоракка Перинатальнай киини тутуу туһунан СР Правительствотын, Россия Доруобуйа харыстабылын министерствотын уонна Булгуччулаах медицинскэй старховкалааһын федеральнай фондатын икки ардыларыгар олунньу 21 күнүгэр түһэрсиллибит үс өрүттээх Сөбүлэһии олоххо киллэриллэр буолла.

"Тутууну ыытыыга Булгуччулаах медицинскэй страховкалааһын федеральнай фондатыттан 2 млрд 394 мөл. солкуобай көрүллэр. Ону таһынан тутуу площадкатын бэлэмнээһиҥҥэ, бырайыактыыр-көрдүүр үлэлэри ыытыыга Саха сирин бюджетыттан 479 мөл. солкуобай көрүллэрэ бигэргэннэ. Онон Перинатальнай киини тутуу үлэтэ саҕаланар кыахтанна", – диэн СР Үпкэ министерствотын бюджекка департаменын салайааччыта Владимир Сивцев иһитиннэрдэ.

Саҥа медицинскэй объегы тутууга куорат 150-с кварталыгар сир учаастага бэриллибитэ. 130 куойкалаах саҥа уораҕайга консультациялыыр-диагностикалыыр киин, акушерскай уонна педиатрическай стационардар баар буолуохтара. Перинатальнай киин оҕону төрөтөр эрэ буолбакка, ийэ оҕо күүтэр кэмиттэн саҕалаан, төрөөн баран доруобуйатын чөлүгэр түһэрэригэр медицинскэй көмөнү хаачыстыбалаахтык оҥорор аналлаах буолуоҕа. Ону таһынан киин үлэһиттэрэ оҕоломмот дьахталлары эмтиэхтэрэ, доруобуйаларыгар улахан кэһиллиилээх эбэтэр оҕо төрөтөрө кутталлаах бөлөххө киирэр дьахталларга сүбэ-ама биэриэхтэрэ.

Онон Перинатальнай киини тутуу быйылгыттан саҕаланара бигэргэннэ. Былаан быһыытынан 2016 с. үлэҕэ киллэриллиэхтээх. Саҥа киини тутуу уонна аныгы тэриллэринэн сэбилээһин үлэ саҕаланыыта эрэ. Ол эбэтэр үрдүк таһымнаах, аныгы тэриллэри баһылыыр үлэһиттэри бэлэмнээһин улахан оруолу ылыаҕа. Онон Перинатальнай киин үлэһиттэрэ Россия уонна омук сирдэрин сүрүннүүр медицинскэй кииннэригэр баран үөрэнэллэрэ былааннанар.

Россияҕа 2013-2016 сылларга дойду 30 регионугар (83 регион бырайыакка кыттыһар баҕатын биллэрбитэ) бастакы уочаратынан тутуллуохтаах Перинатальнай кииннэр ортолоругар Саха сирэ киллэриллибитэ улахан ситиһиинэн ааҕыллар. Субъектары таларга араас чахчылары, ол иһигэр саҥа төрүүр оҕо уонна ийэ өлүүтүн көрдөрүүлэрин, үрдүк технологиялаах перинатальнай көмө инфраструктуратын, демография көрдөрүүлэрин, географияческай уратыларын уо.д.а. учуоттаабыттара.

Анатолий Медведев Перинатальнай кииннэри тутарга сөбүлэҥ бэриллибитин үрдүнэн сорох регионнар бытааран биэрэн, бырайыагы атахтыылларын тоһоҕолоон бэлиэтээтэ. Сорох регионнар Перинатальнай киини туталларыгар сир учаастагын да тыыра иликтэрин, нуорма-акталара да оҥоһулла иликтэрин сэмэлээтэ.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 4948 Источник: Газета "Саха Сирэ" Автор: Надежда Егорова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ