Чурапчыга полиция дьиэтин үөрүүлээхтик аһыыга Егор Борисов сырытта

Республика президенин э.т. Егор Борисов РФ Ис дьыалаҕа миниистирэ генерал-полковник Владимир Колокольцевы кытта элбэхтэ кэпсэппитин, туруорсубутун түмүгэр Сангаарга, Бороҕоҥҥо, Бэрдьигэстээххэ полиция модульнай дьиэлэрин тутууга федеральнай министиэристибэ 200 мөл. солк. анаата. Бу туһунан муус устар 28 күнүгэр Чурапчыга полиция дьиэтэ үөрүүлээхтик аһылларыгар эттэ республика ис дьыалаҕа миниистирэ Виктор Кошелев. Бу тэрээһиҥҥэ Егор Борисов, правительство бастакы вице-премьера Генадий Вадюхин, спорт миниистирэ Михаил Гуляев, норуот депутата Иван Макаров, президент уонна правительство дьаһалтатын салайааччыта Юрий Куприянов, о.д.а сылдьыбыттарын туһунан республика президенин э.т. сайтыгар суруллар.

Быраабы кэһиини эрдэттэн сэрэтиигэ анаммыт республикатааҕы бырагыраама үбүгэр-харчытыгар 185 мөл.солк. Чурапчыга полиция дьиэтэ тутулунна. Быраабы араҥаччылыыр уорганнарга бу бүтэһик уонна соҕотох тутуу буолбатах.

Виктор Кошелев республика баһылыгын э.т. Егор Борисовка полицияҕа эргиччи көмөтүн иһин улаханнык махтанна.

Уһук Илини балысханнык сайыннарыы кэмигэр дьон-сэргэ нус-хас, чуумпу олоҕо хааччылыннаҕына эрэ, бу регионнарга глобальнай боппуруостар быһаарыллар кыахтаахтарын туһунан В.Кошелев эттэ.

"Саха сиригэр оскуола, оҕо сада, балыыһа курдук социальнай эбийиэктэр саҥа дьэндэйэн тахсалларыгар дьон үөрэнэ быһыытыйда. Оттон полиция эбийиэктэрин суолтата онтон итэҕэһэ суох», - диэтэ Е.Борисов. Буруйу оҥорууну утарылаһыыга полиция сыратын сыаналыахха, өйүөххэ наадатын кини ордук чиҥэтэн эттэ.

СР ИдьМ тэрилтэлэрэ кэлиҥҥи сылларга дьоһун ситиһиилэрдээхтэр. Үлэһиттэргэ табыгастаах уонна сөптөөх усулуобуйаны тэрйиигэ улахан кыһамньы ууруллар. Егор Борисов Чурапчы полициятын үлэһиттэрин кытта көрсүһүүгэ үлэ хаачыстыбатын өссө тупсарарга ыҥырда.

Олох таһыма үрдээһинин кытта тэҥҥэ уопсастыба былаас уорганыттан ирдиирэ улаатан иһэр. Иэдээн, алдьархай буолла, доруобуйаҕа, баайга-дуолга хоромньу таҕыста эрэ дьон туох-ханнык иннинэ полицияҕа тиийэрин, полиция үлэһиттэрэ маннык түгэҥҥэ үлэлэригэр идэтийбиттэрин эрэ буолбакка, кэпсэтиигэ-ипсэтиигэ үрдүк култууралаахтарын көрдөрүөхтээхтэрин Е.Борисов бэлиэтээтэ. «Биир полицейскай нэс сыһыаныттан бүтүн полиция аатыгар-суолугар, аптарытыатыгар күлүк түһэр», - диэтэ кини.

Саха сирин баһылыгын э.т. полиция үлэһиттэрэ аҥаардас үлэнэн эрэ муҥурдамматтарыгар, дьону-сэргэни кытта ыкса ситими олохтуурга, култуура, спорт, о.д.а уопсастыбаннай олоххо көхтөөхтүк кыттан үтүө холобур буолуохтаахтарын туһунан эттэ. Ити барыта полиция аатын-суолун, аптарытыатын үрдэтиигэ сүҥкэн оруоллааҕын кини ойуччу тутта.

При частичном или полном использовании материалов гиперссылка на сайт ysia.ru обязательна.

Категория: Территория Просмотров: 6434 Источник: ЯСИА Автор: СИА

Версия для печати

Вернуться на главную

Подписаться на обновления